RAL: Umiarsuarnik nutaanik marlunnik sanatitsilersoq
Royal Arctic Line tallimanngornermi umiarsuit marluk sanaartorneqarnissaannut spaniamiut amutsiviannik isumaqatigiissummik atsioqateqarpoq. Umiarsuit ukiut marluk missaat qaangiuppata Avannaani angalalissapput.
Umiarsuarnik marlunnik sanatitsisoqarnissaanut Royal Arctic Line A/S Zamakona Yards Bilbaomi, Spaniami amutsivik tallimanngornermi atsioqatigiipput, Norgemiut Havyard Design ilusilersuisussatut toqqarneqarput.
Umiarsuaatileqatigiiffik tusagassiuutinut nalunaarummi allappoq.
- Isumaqatigiissulli aatsaat atuutivilissaaq Royal Arctic Line A/S-mi siulersuisunit umiarsuit aningaasalersorneqarnissaat akuerippassuk, tamannalu qaammatit pingasut ingerlaranni pisussatut naatsorsuutigineqarpoq, pisortaanerup tullia, Taitsianguaq Olsen, taama nalunaaruteqarpoq.
Umiarsuit avannaani angalassasut
Umiarsuit marluk taakku kalaallit erfalasuanik erfalasoqassapput, pilersaarutaavorlu ukioq 2020 atulissasut, taakku ‘Pajuttaat’ aamma umiarsuaq attartorneqartoq ‘Vestlandia’ 1979-imi aamma 1983-imi sananeqartut taarsissavaat.
- Umiarsuit nunatta avannaani angalasussatut nalimmassagaapput useqarsinnaanerullutillu.
- Royal Arctic Linemut angusaq pingaaruteqarpoq umiarsuaatitta nutaanngilisut taarserneqarnissaanut, umiarsuaatileqatigiiffik taama nalunaarpoq.