RAL: Sikulernerata avannaani angallassinermut pilersaarutit akornusersinnaagai
Upernavimmi nunaqarfiinilu sikujartornera pissutigalugu Royal Arctic Linep sumiiffimmi assartuinini unitsittariaqassagunarpaa.
Baffinbugtimi imaq sikujartupallappoq. Taamatullu Uummannap eqqaani Qeqertarsuullu tunuani sikpallaratarsinnaanera ilimagineqartariaqarpoq, sila maannatut innarnissaa naatsorsuutigineqassappat, umiarsuaatileqatigiiffik tusagassiutinut nalunaaruteqarpoq.
- Naatsorsuutigaarput ”Vestlandia”-p angalanerata nr. 1843-p Upernavimmi eqqaanilu tikitassai angusinnaassallugit – angalanerit siuliini kinguaattoornerit pilersimasut pissutigalugit – kinguaattoornertalimmik. ”Vestlandia”-p angalanissaa nr. 1844, aamma Upernavimmut eqqaanullu, pivisunngorsinnaassanersoq kingusinnerusukkut nalunaarutigiumaarparput, umiarsuaatileqatigiiffik allappoq.
Nalorninartoqarpoq
- Uummannap sulluani tikitassagut, ”Pajuttaat”-ip angalaneri nr. 1843 aamma nr. 1844, Uummannamut eqqaanullu, iluatsissasut naatsorsuutigaaarput. Angalanerilli ukioq manna kingulliit, tassa ”Pajuttaat” nr. 1845 aamma nr. 1846, novemberip naajartornerani pisussat – aamma Uummannamut eqqaanullu – piviusunngorsinnaassanersut kingusinnerusukkut nalunaarutigiumaarpagut.
Umiarsuaatileqatigiiffiup sumiiffinni sikup silallu qanoq inneri nalinginnaasumit nakkutigilluarnerussallugit, taamatullu assartuinermut pilersaarutit sapinngisamik naammassiniassallugit, paasititsissutigaa.