angallassineq
RAL - Periarfissat imaluunniit isumaannakkut pilersaarut?
RAL-ip angalasarfii nutaat inuiaqatigiinnut annertuummik iluanaaruteqartitsissapput, umiarsuaateqarfik isumaqarpoq. Suliffeqarfissuit aalisakkeriviutillit kisinneqartut upperinngilaat.
Royal Arctic Linemi pisortaaneq, Verner Hammeken qulanngilaq: Kalaallit Nunaanni angallassinerup ilusaa nutaaq annertuumik iluanaarfiussaaq, minnerpaamik inuiaqatigiit 80 millioninik iluanaaruteqassasoq naatsorsuisimavoq.
Aalborgimi umiarsualivik aallaavittut atorneqarunnaarpat, Nuummi aalisakkat nioqqutissat poortorneqareerlutik, Aarhus aqqutigalugu nunarsuup sinneranut apuussinnaapput.
- Aarhusimi talittarfimmit containerimik Kinami Qingdaoimut aqqutaani poortoqqittariaqanngitsumik toqqaannartumik nassiussisinnaalerneq, angallannerup ilusaata nutaap kinguerissavaa, Verner Hammeken Sermitsiaq.AG-mut oqarpoq.
Naatsorsuutit upperinngikkaat
Danmarkimi qerititsiveqarfinnit nioqqutissanik nassiussisinnaanissamut kisianni pisariaqartitsivugut, Polar Seafoodimit oqariartuutigineqarpoq. Aalajangersimasumik pisoqartillugu Kalaallit Nunaannit angalaniarneq sivisuallaartarpoq.
- Assersuutigalugu Lidl raajanik inniminniiguni taava ullut tallimat qaangiuppata raajat taakku Tysklandimi illoqafiit ilaanni tigussavai. Aamma poorskikkunni juullikkunnilu niuernerit taamaapput. Taava 500 tonsinik arlaannik atuissallutik oqassapput, kisianni 150 tonsiinnarnik pisinnaasut qulakkeerneqarsinnaammat sinneri kingusinnerusukkut tunniuttariaqassavavut. Umiarsualivippullu Nuummiissappat taamatut iliorsinnaanngilagut, Henrik Leth, oqarpoq.
Avammut tunisinermut periarfissat nutaat
Systemimit matoqqasumit Aalborgip aamma Nuup akornanni angalanermit, systemimut ammasumut aaqqiinermi Verner Hammeken iluaqutsissanik amerlanernik takusaqarsinnaanerarpoq, tunngaviusumik containerinik nunarsuup sinneranut nassiussisisoqarsinnaalluni.
- Nunarsuaq tamakkerlugu toqqaannartumik avammut tunisinissamut aqqut nutaanik ineriartortitsinissamut periarfissiivoq. Sinaakkutik pilersissavagut, taava suliffeqarfiit periarfissat taakku atussanerlugit aalajangissavaat, taanna oqarpoq.
Danmarki uniffissatut atorunnaaraanni, aalisakkap suliarineqarnerata ilaa Nunatsinnut nuunneqarsinnaasoq tamatuma saniatigut oqaatigaa. Tamanna RAL-ip 10 procentiussasoraa, tamannalu 36 millionit koruuninit iluanaarfiussalluni.
Oqaloqatigiinnissamik amigaateqartoq
Kisianni aalisakkanik avammut tunisisuusunik tassani isumasioqqaarsimanngilaq, Henrik Leth naqissusiivoq.
- Suliffissuaqarfimmiut aperisimagaluarunigit ersarissumik akineqarsimassagaluarpoq. Kisianni taassuma naatsorsugaani kisitsisit naleqquttut tunniussinnaannginnatsigit suleqatigiinnit anisitaavugut. Taava tusaajumajunnaarpaatigut, Henrik Leth AG-mut oqarpoq.
RAL-ip angallassinermut akit appasinnerusunik neriorsuisinnaanani toqqaannartumik niuernermik ammaassiinnarniarmat, Polar Seafoodimi piareersaanermut aqutsinermullu pisortap Michael Pedersenip iluaqutissat takujuminaatsippai.
- Toqqaannartumik niuernerup aallarteriarnissaanut taamaallaat iluaqutaassaaq avammut nioqquteqartartunut iluaqutaangaatsiarluni. Taamaasinnaanerali takusinnaanngilarput, taanna Sermitsiamut oqarpoq.
Kisianni tassani periarfissarujussuit tassaniittut Verner Hammekenip aalajangiusimaannarpaa.
- Ilusermi nutaami Sulisitsisut aamma Polar Seafoodip ineriartornissamut periarfissaq takunngitsooraat isumaqarpugut, taanna Sermitsiaq.AG-mut oqarpoq.