RAL-p Aalborgimi sulisuisa suliumajunnaarnertik attatiinnaraat

Royal Arctic Linemi Aalborgimi sulisut 65-it missaanniittut ippassaq suliumajunnaarput.

Umiarsuaateqarfiup Aalborgimiikkunnaarnissaanik pilersaaruteqarnera akerliuffigalugu tamanna pivoq.

Suliumajunnaarneq sulisut isumaqatigiissutaannik unioqqutitsinerusoq ullumi nanginneqarpoq. TV2 Nord allaaserinnippoq

- Sulisut tamarmik angerlarput. Ilisimatikkaluarpagut suliumajunnaarneq sulisut isumaqatigiissutaannik unioqqutitsinerusoq, kisianni sulerusunngillat. Royal Arctic Linep 2019-mut nuutsitsinissamik aaliangersimanerannik, aqutsisuniillu pisussamik ilisimatinneqarsimannginnermik tusagassiutaannartigullu paasisaqarsimaneq sulisut pakatsissutigaat. 3F-ip ataani Transportgruppenimi siulittaasup tullia Ole Nors Nielsen, TV2 Nord-imut taama oqarpoq

Suliumajunnaartut tallimanngornermi ullaakkut naapeqqissaput, tassani qanoq pisoqarnissaanik aalajangiissallutik.

Kalaallit Nunaannut angallanneq ataatsimut isigalugu Aalborgimi suliffinnik 1800 missaanik pilersitsisoq, Aalborgimi erhvervschefi Tonny Thorup, DR Nordjyllandimut naliliisimavoq.