Aalborgimut inuulluaqqusineq
RAL naqissusiivoq: - 2019-imi Aalborg qimassavarput
RAL-ip pisortaanerata, Verner Hammekenip Aalborgip umiarsualivianik isumaqatiginninnissaq anguniarpaa.
Royal Arctic Linep pisortaanera, Verner Hammeken nalorninngilaq. Isumaqartigiissut 2022-imi qaangiuppat umiarsuaateqarfiup Aalborgimi umiarsualivik qimassavaa, 2019-imilu qimannissaa iluatsissasoq naatsorsuutigaa.
- Pingaarnertut umiarsualiveqarnissamik eqqarsarneq naleqqukkunaarpoq.
- Isumaqatigiissut qaangiuppat sivitsoqqinnianngilarput, taamaammat piffissaq 2022 sioqqullugu ingilluta oqaluuserisinnaaneripput, Aalborgimi umiarsualivimmut oqarpugut.
200 millionit koruuninik aarlerisaarisoq
RAL-ip ulloq aalajangiussaa tassaavoq, juuli 2019.
- Isumaqatigiissutip qaangiutinnginnerani taamaatinnissaanut suut aporfiunersut Aalborgimi umiarsualivik oqaloqatigissavarput.
Isumaqatigiissut taamaatinneqassappat, Aalborgimi umiarsualivik 200 millionit koruuninik taarsiivigeqquniarluni aarlerisaarivoq.
Isumaqatigiissutip taamaatinnissaa akeqanngitsoornavianngitsoq ilisimallugu, Verner Hammeken oqarpoq, kisianni qanoq amerlatigissanersut tusagassiuutitigut oqaluusererusunngilaa.
- Aalborgimi umiarsualivik isumaqatigiinniarnermik aallartinniarlugu taamatut nalunaaruteqarpugut, pisortaq oqarpoq.
- Isumaqatigiissut 2019-imi taamaatinniaraanni qanoq taarsiutisissanerlutik, Aalborgimi umiarsualiviup naatsorsuutitik naapissinnaassavaat.
Taarsiigaluarluni akilersinnaasoq
RAL-ip nutaamik angallassisalernissamut pilersaarutiminnut taartisiaasinnaasumik kisitsisimavoq. Pilersaarutillu qanoq pisoqaraluarpalluunniit aningaasaqarnikkut pitsaasuusut, Verner Hammeken naqissusiivoq.
- Iliuusissatut pilersaarutitsinni assigiinngitsunik pisinnaasunik aaqqiissuteqarpugut, tassanilu pisinnaasut tamarmik aningaasaqarnikkut pilerinartuupput.
- Tamanna RAL-imut aamma Kalaallit Nunaannut iluaqutsiissaaq.
Aaqqiissummik isumaqatigiissusiornissamut Aalborgimi umiarsualivik Verner Hammekenip kajumissaarpaa.
- Tamanna qanoq ataqqinnittumik aporaaffiunnginnerpaamillu naammassisinnaanerlugu oqaluuseritigu, RAL-ip pisortaanera oqarpoq.
Aamma atuakkit:
Aalborg Havn taarsiivigineqarnissaminik siorasaarisoq