Suliffeqarfiit
RAL kalaallinik imarsiortunik amerlanerusunik ilinniagaqartitsiniarpoq
Siners inuttanut marluinnik oqaasilinnut nutaamik periarfissaavoq
Royal Arctic Linep umiarsuaammini inuttat ilarpaalui nunat allamiunik taarserniarpai. Tamanna peqatigalugu umiarsuit atlantikoortaatit qallunaat erfalasuat atorlugu angalajunnaaratarsinnaapput. Tamanna nettimi nutaarsiassaqartitsivimmi shipiingwatch-imi atuarneqarsinnaavoq.
Inuttat kalaallit ilinniagaqartinniarpai
Akerlianik selskabi kalaallinik umiartortunik amerlanerusunik ilinniagaqartitsiniarpoq, RAL tusagassiorfinnut nalunaarutikkut allappoq.
– Taamaasilluni Eimshipimik suleqaateqarnerup kingunerisaanik sulisuvut ataatsimut isigalugu 16-inik ikinnerulerput, taamaakkaluartorli kalaallit umiarsuarni inuttat ullumikkuminngarnit pitsaanerusumik siuarsarnissaannut periarfissarissaarnerulissaagut, Royal Arctic Line allappoq.
Sinersornermi atorfiit
Tamatumunnga nassuiaatigineqarpoq sinerissakkut assartuineq pitsaanerulersinneqassasoq, inuttanillu marluinnik oqaasilinnik pisariaqartitsineq annertunerulissasoq.
– Umiarsuarni inuttat ikinnerulaalissapput, kalaallilli umiartortut ilinniagaqarnissaannut periarfissat pitsaanerulissapput, tusagassiorfinnut nalunaarummi allassimavoq.
RAL-ip sinerissami assartuussinermi atorfiit 48-t angullugit inuttassarsiussavai.
Nunatsinnut annaasaqaataanngitsoq
Selskabip maluginiaqquvaa ullumikkut umiarsuarni inuttamik 80%-ii Danmarkimi najugaqartuummata. Taamaattumik ataatsimut isigalugu RAL isumaqarpoq Eimshipimik suleqatqarnertik nunatsinni sulisartoqarnermi iluaqutaassasoq.
– Kalaallit Nunaanni akileraarutitigut isertitanik annaasaqarnavianngilagut, inuttanullu marluinnik oqaasilinnut atorfeqarnissamut periarfissat pitsaanerupput, RAL erseqqissaavoq.