Nuuk

RAL-ip eqqumiitsuliat assartorneqarnerat aningaasaliiffigaa

Ukiuni pingasuni tulliuttuni eqqumiitsuliat Nuummi Eqqumiitsuliornermut Katersugaasivimmi saqqummersinneqartartussat assartorneqartarnissaannut Royal Arctic Line aningaasaliisartuussaaq

Bolatta Silis Høegh, kunstudstilling, Nuuk Kunstmuseum
Nuummi Eqqumiitsuliornermut Katersugaasivimmi eqqumiitsulianik saqqummersitsinermit assi

Manna tikillugu eqqumiitsuliortut eqqumiitsuliaminnik Nuummut assartuisarnerit namminneq akilertarpaat. Kisianni Nuummi Eqqumiitsuliornermut Katersugaasiviup aamma Royal Arctic Linep akornanni nutaamik isumaqatigiissuteqartoqarneratigut, piffissami tulliuttumi sivisunerusumi eqqumiitsuliortut eqqumiitsuliornertik kisiisa qitiutissinnaalissaavaat.

Ukiuni tulliuttuni pingasuusuni Kalaallit Nunaanni sumiiffinni eqqumiitsulianik aamma Kalaallit Nunaanniit Danmarkimut killormullu umiarsuarmik assartuisarneq Royal Arctic Linemit isumagineqartalissapput.

Saqqummersitsinerit pitsaanerusut
- Tamatuma kingunerisaanik Nuummi innuttaasunut saqqummersitanik annertunerusunik pitsaanerusunillu saqqummersitsisarnissarput neriuutigaarput, Nuummi Eqqumiitsuliornermut Katersugaasivimmi aqutsisoq Nivi Christensen Sermersooq.gl naapertorlugu oqarpoq.

Royal Arctic Linep aamma Nuummi Eqqumiitsuliornermut Katersugaasiviup aningaasaliinissamik isumaqatigiissutaasa malitsigisaanik ilaatigut eqqumiitsuliortup toqukkut qimagutereersup Anne Birte Hovep eqqumiitsuliaanik 2016-imi saqqummersitsinissarsuaq Nuummi Eqqumiitsuliornermut Katersugaasivimmi qilanaarineqartorujussuuvoq.

Aamma atuaruk: RAL sipaarniarnerulerpoq

Powered by Labrador CMS