RAL-ip Eimskip umiarsuit nutaat pillugit suleqatigaa

Royal Arctic Line aamma Islandermiut umiaarsuaateqarfiat Eimskip suleqatigiinnissamut isumaqatigiissummik atsioqatigiipput, taakku umiarsuit containerinik usisaatit titartarneqarlutillu sanatinneqarnissaat aningaasaliiffigalugillu ingerlanniarpaat, umiarsuaateqarfik Namminersorlutik Oqartussanit pigineqartoq ilisimatitsivoq.

Taamaalillutik umiarsuit nutaat nunarsuup avannaani Atlantikullu avannaani anorersuartarnernut Polar Koden naapertorlugu naleqqussagaasunngussapput.

Avatangiisinut mingutsitsinnginnerusut
Umiarsuassallu orsussamik atuinikinnerussapput taamaammallu avatangiisinut mianerinninnerusuussallutik. Illuatungeriinnit naatsorsuutigineqarpoq ilusissaasa piareersarneri sananerilu ukiunik marlunnik-pingasunik sivisussuseqarumaartut.

Umiarsuit nutaat Kalaallit Nunaata Islandillu Nunat Avannarlernut Europamut Amerikallu avannaatungaanut assartuinerat ataqatigiissassavaat, suliffeqarfiit naqissusiipput.

Isumaqatigiissut aatsaat naammassivinneqassaaq umiarsuaatileqatigiiffiit piginnittui akuersippata, aammalu Islandimi EU-milu unammilleqatigiiinneq pillugu oqartussaasut akuersippata.

Alloriarneq pingaarutilik
Una pisoq Kalaallit Nunaata nunarsuup sinneranut attavilerneranut pingaartuuvoq. Taamak pisoqarneratigut sullissagut avammut tunisassiortut periarfissagissaarnerulissapput tunisassianik katersueqqaartoqarsinnaalissamat tamakku immineq akilersinnaanerusumik tunngaveqartumik nunarsuaq tamakkerlugu nassitsivigisassanut toqqaannartumik assartorneqartinnagit, Royal Arctic Linep pisortaanera, Verner Hammeken tusagassiuutinut nalunaarummi erseqqissaavoq.

Eimskip nunani 19-ini 57-inik allaffeqarfeqarluni ingerlatsivoq 20-inillu umiarsuaateqarluni. Sulisut 1.580-t missaaniipput. Eimskipip isertitaasa affaasa missaat Islandip avataani sulianinngaanneersuupput.