RAL-ip assartuinermut akit maanna qaffappai
Siullermik Air Greenlandip, manna aamma Royal Arctic Linep uuliap akiisa qaffakkiartorneri pissutigalugit akit qaffappai.
Danmarkimut timmisartorneq aamma nassiussat Royal Arctic Linekkut nassiunneqarneri akisunerulerput.
Uuliap akiisa qaffakkiartornerat pissutigalugu suilffeqarfiit Namminersorlutik Oqartussanit pigineqartut akit qaffanniarlugit aalajangerput.
4 procentinik qaffattut
Uuliamut aningaasallu nalingannut tapiliuttagaq 2 procentinit 6 procentinut qaffanneqartoq, umiarsuaatileqatigiiffik ullumi nalunaaruteqarpoq.
- Ukiup naanissaata tungaanut qaammatini kingullerni marlunni akinik nutaanik 6 procentimik ilasanik Royal Arctic Linep atuutsitsisinnaaneranut umiarsuaatileqatigiiffik akuerineqarpoq, pisarnitsitulli naleqqussaanerit qaammatikkaartumik nalunaarutigisassavagut. 6 procentimik naleqqussaalluni akit nutaat novembrip aallaqqaataat 2018 aallarnerfigalugu nassiussassatut nalunaarutigineqartunut atuutilissapput. Taamaattumik nassiussat tigoriikkatta akii akinit nutaanit sunnerneqassanngillat, Royal Arctic Line tusagassiuutinut nalunaarummi allappoq.
Uuliamut aningaasallu nalingannut tapiliuttagaq – BAF/CAF-itut ilisimaneqartoq – marsimi 2017-imi 2 procentimiissimasoq, umiarsuaatileqatigiiffik ilisimatitsivoq.
Atorsinnaajunnaartoq
- Royal Arctic Linep naleqqussaanissani ullumikkumut kinguartissinnaasimavaa uuliap akitsoriartornerata nalaani dollarip nalingata appariartorsimanera pissutigalugu. Maannali akeq danskit koruuniinut naleqqiullugu 2014-imi oktoberip qaammataata nalaani akiusumut inisseqqissimavoq, taamani CAF/BAF-iusumut, tassa 6 procentimut, umiarsuaatileqatigiiffiup qaffaanini taama tunngavilersorpaa.
Sapaatip-akunnerata siuliani Air Greenlandip nalunaarutigaa, Københavnimut uterlugu bilitsit 300 koruuninik akitsussasut, ikummatissat akiisa qaffakkiartornerat pissutaalluni.