RAL-ip Aalborgimi umiarsualivimmik suleqateqarnini taamaatippaa

Royal Arctic Line 2019-ip qiteqqunneranit Aalborg avaqqullugu angalasalerniarpoq. RAL-imi pisortap Verner Hammekenip pingasunngornermi Aalborg Havn A/S-imi ataatsimeeqateqarnermini nalunaarutigaa.

- Nalunaarut tamanna tupaallaatigisorujussuuarput, piffissami sivisuumi 2022-ip tungaanut ingerlasussamik isumaqatigiissuteqarpugut, Aalborg Havnimi pisortaq Claus Holstein oqarpoq.

Aalborgip isumaqatigiissut attappaa
Qaammatup naalernerani RAL-imi siulersuisuni siulittaasup Kuno Fenckerip aamma borgmesterip Thomas Kastrup-Larsenip Aalborg Havn A/S-illu akornanni ataatsimiigiaqqusisoqassasoq, taassuma oqaluttuaraa.

Aalborg Havnip 2010-mit 2022-ip tungaanut ingerlasumik isumaqatigiissuteqarlutik aalajangiusimavaa.

- Ukiuni 45-ni aallaavittut umiarsualiviunikuuvugut, taamaammat tupaallappugut, Claus Holstein oqarpoq.

Thomas Kastrup-Larsenip qanittukkut Kuno Fenckerimik ataatsimeeqateqarnermini Aalborgimi umiarsualivik suli aallaaviunissaanik ersarissumik paasinnikkami tupaallaatiginngitsoornerarpaa.

RAL-imi periusissaq nutaaq
Royal Arctic Line tusagassiuutinut nalunaarummi ima allappoq.

- Suliffeqarfittut pisinnaatitaavugut Kalaallit Nunaanni ineriartortitseqataasinnaasunik suliniutinik pilersaarusiorsinnaalluta. Taamaattumillu aaliangersimavugut ammasumik ataqqeqatigiittumillu sulisut suleqatillu oqaloqatigineqassasut, taamaasiornikkullu pitsaasumik tamatsinnullu iluaqutaasussamik aaqqiissummik nassaartoqassasoq.

- Aalborgip umiarsualivianiillu aaliangiunneqarsimavoq Kalaallit Nunaanni assartuisoqartarneranik pitsanngorsaasoqarnissaanit suli oqaloqatigiittoqarnerani paasissutissiisoqassasoq, RAL taama allappoq.

Aalborgimi nalornineq
Aalborg Havnimi illuanik isumaqartoqarpoq, iluminni isumaqatiginninniarnerit nalunaarutigissallugit pissutissaqarluartut.

- Nalinginnaasumik tamakku kikkunnut tamanut ammasumik oqaluuserinavianngikkaluarpagut, kisianni tusatsiakkat suliffeqarfinnut Kalaallit Nunaannut angalasartunut pisariaqartitsisunut nalornilersitsipput, pisortaq Claus Holstein oqarpoq.

- Taamaammat oqaluttuarisariaqarlugit misigivugut.

Sermitsiaq.AG Royal Arctic Linemit oqaaseqartitsiniarluni sulissuteqarpoq