RAL-imiit avannaanut nutaarsiassaq nuannersoq
Upernavimmut Uummannamullu umiarsuit assartuutit kingulliit piffissaq eqqorlugu tikissapput. Royal Arctic Line Sermitsiaq.AG-mut taama ilisimatitsivoq
Juullimut tunissutissanik, Upernavimmut Uummannamulluunniit nassiussassanik pisisimaguit, juullernissaanut tikinnissaat ernummatiginagit eqqissisimaaginnarsinnaavutit.
RAL-imi ilisimatitsivoq Upernavimmut Uummannamullu umiarsuaq piffissaq eqqorlugu tulakkumaartoq.
Sumiiffiit pineqartut sikujartupallakkaluarput, taamaammat RAL novembarip naalernerani nalunaaruteqarpoq sumiiffimmi assartuinissaq ajornakusoorsinnaasoq, taamaattoqalinngilarli.
Kujataani anorersuaq
Kujataanili allatorluinnaq isikkoqarpoq. Maani sikorsuaqanngilaq, taamaattoq anorersuaqarpoq.
Tamanna isumaqarpoq Malik Arcticap Nanortalimmukarnissaralua RAL-ip taamaatiinnartariaqarsimagaa. Malik Arctica avannamukaaginnartariaqarsimavoq.
Aarlerinartoqanngilarli. Assartugassat Nanortalimmut ippassaq apuunneqartussaagaluit, Irena Arcticap sapaammi decembarip 16-iani apuutissavai.