Tusagassiorfik:
RAL 2022-p tungaanut Aalborgimiissaaq
Royal Arctic Linep aamma Aalborgimi umiarsualiviup isumaqatigiissutip qaangiunnissaata tungaanut suleqatigiinnertik ingerlatissavaat
RAL-ip Aalborgimi umiarsualivik sioqqutsilluni qimanniaraa Aarhusimullu ingerlaqqinniartoq siornatigut oqaluuserineqarnikuuvoq, kisianni maanna Aalborgimi umiarsualivimmi pisortaanerup Claus Holstienip naqissuserpaa, Royal Arctic Line 2022-p tungaanut tassaniiginnassasoq.
- Royal Arctic Line allatut perusuppoq, tamannalu tulluarpoq, kisianni 2022-p tungaanut isumaqatigiissummut pituttorsimapput. Piffissap tamatuma kingorna susoqassanersoq maanna isumaqatiginninniutigaarput, Claus Holstien ShippingWatchimut oqarpoq.
Eimskip peqatigalugu Aarhusimut
Royal Arctic Linep Danmarkimi suliani Aarhusimut nuunniarlugit isumaliutersuuteqarnera, Islandimiut Eimskip suleqatigilerneranik tunuliaquteqarpoq, taanna Aarhusimit aallartarpoq.
Atuaruk: Aarhusip talittarfia atorneratigut millionit sipaarneqarsinnaasut
Sapaatip akunnerani kingullermi RAL-ip umiarsuarmik Kinami pisinertik saqqummiuppaa, tassanilu aamma Eimskipimik suleqateqalersinnaanermut alloriaqqilluni nalunaarutigaa.
Atuaruk: Royal Arctic Line umiarsuarujussuarmik pisivoq
Royal Arctic Linep saniatigut Aalborgimi umiarsualivik siunissaq pillugu isumaqatiginninniarfigaa. Isumaqatigiissummik unioqqutitsineq 200 millionit koruuninik taarsiinissamik piumasaqaammik kinguneqassasoq, umiarsualiviup siornatigut nalunaarutigereerpaa.
Atuaruk: Aalborgimit taarseeqqusissummut RAL oqaaseqarusunngilaq
ShippingWatch naapertorlugu illuatungeriit pingasoriarlutik ataatsimeereerput, kisianni sukkasuumik suleqatigiikkunnaarnissaq eqqartorsimanngitsoq, umiarsualivimmi pisortaq issuarneqarpoq.