Royal Greenland

Raajat qalipai nunatsinneersut piumaneqangaatsiarput

Royal Greenlandip Ilulissani aalisakkeriviata raajat qalipai siunissami nunanut allanut tunisassiarilissavai

Raajat qalipaanik qajuusiat ilaatigut kapilisinnut tukertitsivinni nerukkaatitut atorneqartartut, Norgemi tunisaalluarput.

Raajat qalipaanik qajuusiat ukiumut 500 tonsit tunisassiarineqartartut, Ilulissani Royal Greenlandip tunisassiorfianut raajanit tunineqarsimasuniit tunisassiarineqartarput, suliffeqarfik nittartakkamini allappoq.

- Raajat Royal Greenlandimut tunineqartut qalipaannik qajuusiat Norgemi tunisassiorfiit ilaanni piumaneqaqalutik pisiariumaneqartarput. 1980-ikkut ingerlaneranniit ulloq manna tikillugu tunisassiat Norgimiunnaq tunisarpavut. Siunissarli ungasinnerusoq eqqarsaatigalugu raajat qalipaannik qajuusiat nunanut allanut aamma tunisalernissaat takorluugaraarput Frank Nicolaisen Royal Greenlandip nittartagaanut oqarpoq.

Ilulissani Royal Greenlandip tunisassiorfiani ulluni makkunani raajat qalipaannik qajuusiorneq ingerlalluarpoq, raajanik tulaassuinerit ingerlalluarmata.

Assersuutigalugu raajat 68 tonsit missaaniittut tunisassiorfimmut tunineqarangata nioqqutissiaralugit naammassisat 20 tonsit missaanniittarput, qalipat sinneruttut 40 tonsit missaanniittut qajuusiarineqartartut, Frank Nicolaisen nassuiaavoq.

Nunatsinni Royal Greenlandip tunisassiorfiini Ilulissani Sisimiunilu raajanik tunisassiorput. Siunissami Sisimiuni raajat qalipaannik qajuusiortalernissaq aamma soqutigineqarlunilu amaaffigineqartoq Sisimiuni tunisassiorfimmi ingerlatisoq paasissutissiivoq.

Powered by Labrador CMS