Raajat qaleraliillu nunanut allanut tunisaalluarput
Ukiup siuliani taamaasineranut sanilliullugu nunanut allanut tunisat 25,5 procentimik qaffariarput. Niuernermi oqimaaqatigiissut taamaattoq suli amigartoorfiuvoq
Avammut tunisat ukiup affaa siulleq 2018-imi 1.607 million kruuninut qaffappoq. Ukiup siuliani taamaasineranut sanilliullugu qaffariaat 327 million kruuniuvoq.
Raajat aamma qalerallit avammut tunisaalluarput, ukiumi 2016-mi avammut tunisinermut nallersuunneqarsinnaalluni, naatsorsueqqissaartarfimmit ilisimatitsissutigineqarpoq.
Raajat avammut tunisat nalinga 110 millioner koruuninik qaffariarpoq, qalerallit tunineqartut nalingi 150 millioner koruuninik qaffariarlutik.
Niuernermi oqimaaqatigiissut taamaalilluni ukiup affaa siulleq 2018-imi amigartoorut 276 mio. kr.-uvoq, tamanna ukiup affaa siulleq 2017-mut sanilliullugu niuernermi oqimaaqatigiissut 328 mio. kr.-inik pitsanngoriarfiuvoq.