Aalisarneq
Raajartassat 85.000 tonsinut amerlivaat
Sisamanngormat aalajangiunneqarpoq aappaagumut raajartassat 16 procentimik amerlineqassasut, biologit tupaallannartumik inassuteqaataat nutaaq tunuliaqutaralugu
Kalaallit Nunaat ingerlatsiviusuuppat børsimi nalunaarsortissimasoq, taava nalinga akunnerni makkunani qaffariartussagaluarpoq.
Tassami Naalakkersuisut ullumi, novembarip 12-ianni 2015, nalunaarutigeqqammerpaat aappaagumut raajartarssat amerlanerujussuussasut.
Kitaani nunatta aalisagaataanik naleqarnerpaanik TAC (pisassat tamarmiusut, aaqqiss.) aalajangiunneqarpoq 85.000 tonsiussasut, tamannalu pissutigalugu landskarsi millioninik arlalinnik isertitsissaaq.
Pisassat agguarlugit
Taamaasilluni ataatsimut pisassiissutit 2015-imut sanilliullugit 16 procentimik amerlanerupput, siorna pisassat 73.000 tonsiusimammata.
Biologit inassutigisimavaat 2016-imi Kitaani 90.000 tonsit pisarineqarsinnaasut.
Aalisarnermik ingerlatsisut annersaat - piffissamut sivikitsumut soqutigisatik akerleralugit - nalunaarsimagaluarput kissaatigalugu ukiumut pisassiissutit 12,5 procenti sinnernagu qaffanneqassasut, Aalisarnermut Siunnersuisoqatigiit pilersaarutaat akuersissutigineqarsimasoq ataqqillugu, aammalu piffissaq ungasinnerusoq isigalugu nungusaataanngitsumik aalisarnissaq eqqarsaatigalugu.
Naalakkersuisulli tassa aalajangerput tamanna iluanaarniarfiginiarlugu.
2016-imut TAC-mut aalajangikkamit 2.600 tonsit EU-mut immikkoortinneqassapput, EU-mik aalisarnermik isumaqatigiissut naapertorlugu.
Tamatuma saniatigut 2.199 tonsit Canadamut immikkoortinneqassapput.
Sinneri agguarneqassapput avataasiortuynut 45.715 tonsinik sinerissamullu qanittumi aalisartunut 34.486 tonsinik.
Tunumi TAC 5.300 tonsinut aalajangiunneqarpoq, taakkualu agguarneqassapput kalaallit umiarsuaatileqatigiiffiinut 200 tonsit, 5.100 tonsillu EU-mut.
Siunnersuutigineqartut qaffapput
Biologit Kitaani aappaagumut raajartassanut siunnersuutaatigut ukiuni kingullerni ikiligaluttuinnartunik siunnersuisarneq killormut nikisinneqarpoq. Siunnersuisarnerit ikiligaluttuinnareersimallutik 2014-imiillu 2015-imut siunnersuutigisat 80.000 tonsiniit 60.000 tonsinut ikileriarujussuareersut, 2016-imut siunnersuutit 50 procentimik qaffanneqarput - 60.000 tonsiniit 90.000 tonsinut.
Naalakkersuisut siusinnerusukkut 2015-imi 2016-milu Qimusseriarsuarmi misileraalluni aalisarnissamut ukiunutd tamanut 3.000 tonsit pisassiissutiginikuuvaat, pisassiissutillu taakkua TAC-p saniatigut pisassiissutaapput.