tusagassiorfiit

Qupperneq oqallittarfik nutaaq

Avalammi siulittaasuusimasup Hans Peder Kirkegaardip ataasinngormat nittartagaq nutaaq, Kalaallit Nunaannik allanngortitseqataasussaq, saqqummiuppaa

Avalaap siulittaasorisimasaata Hans Peder Kirkegaardip qupperneq oqalliffik nutaaq Aqago pilersippaa, taannalu ataasinngorpat Ivalu Stenderilu ilisaritissavaa

"Oqallinnikkut nuna pilersinneqartarpoq", taamatut tusagassiorfinnut nalunaarutikkut allapput Hans Peder Kirkegaard aamma Ivalu Stender, tassuuna oqaluttuaralugu Aqago, nittartagaq nutaaq, aqagu ataasinngornermi novembarip 10-anni Københavnimi Kalaallit Illuutaanni saqqummiunniagartik.

Suliniutikkut Aqago Kalaallit Nunaat allanngortinniarneqarpoq nuna, Kalaallit Nunaat, pillugu oqallinnikkut, suniarpugut, kalaallisut inuunerup suna siunertaraa, sooq nunaavugut?, suliniutillit marluk tusagassiorfinnut nalunaarutikkut oqaluttuarput.

– ´Aqago´ allattaasitoqqatut allapparput, pissutigalugu qanga pisut tamakkualu ullutsinni kinguneqaatai eqqarsaatiginiaratsigit, tamannalu peqatigalugu ullumikkut qanoq iliorsinnaanersugut siunissaq pitsaanerusoq pilersinniarlugu. Oqartussaaqataanerup ineriartornerata sammineratigut, aammalu upperalugu innuttaasut paasisimasallit iilnniarsimasullu oqartussaaqataanermik nukittorsaassasut, Aqago isumassarsianik Kalaallit Nunaannik tunngaviliisunik oqallitsitsiniarpoq, kiisalu inuusuttut inersimasullu amerlanerusut kajumissaarlugit Kalaallit Nunaat isumassarsiatut eqqarsaatigeqqullugu. Anguniakkap tamatuma ilagaa ilinniagartuunit ilisimatuunillu sammisat siammarsarnissaat, paasiuminartumik atuaruminartumillu. Tamanna aallaavigalugu innuttaasut Kalaallit Nunaanni ullumikkut ajornartorsiutit takusinnaallugillu itinerusumik paasisinnaavaat, Hans Peder Kirkegaard aamma Ivalu Stender quppernermik ilisarititsinerminni oqaluttuarput.

Piffissaq ungasinnerusoq isigalugu Aqago-p kissaatigaa Kalaallit Nunaat pillugu oqallinermi amerlanerusut peqataalissasut.

Aqago-p suleqatigai Københavnimi Kalaallit Illuutaat aamma KNR.

Aqago-p siammarsarniagai saqqummiunneqartassapput quppernermi www.aqago.org-imi allaaserisatigut kiisalu KNR-mi radiokut aallakaatitatigut.

Aqago aamma oqallinnernik aaqqissuussisarniarpoq, siullerlu pissaaq Ilulissani Atuarfik Jørgen Brønlundimi novembarip 19-ianni.

Hans Peder Kirkegaard Ivalu Stenderilu ilisimasallit allaaserisaannik ilanngussisarniarput, ilaatigut amerikarmiut ambassadøriannit Rufus Goffordimit kiisalu Ilisimatusarfimmi Tusagassiornermut Immikkoortoqarfimmi adjunkimit Naimah Hussainimit.

Nittartakkap ilisarnaataa sananeqarsimavoq Liss Stenderimit, Inuk Design. Nittakkamilu assit atoneqarnerat aamma Mads Pihlimit akuerineqarsimavoq, suliniutillit marluk paasissutissiipput.

Powered by Labrador CMS