Qungujunnartoq, nuannersoq inuppalaartorlu

Aliikkutaralugu isiginnaartitsisartut peqatigiiffiannit N.A.I.P.-mi ilaasortat tallimanngormat unnukkut kulturip illorsuani Katuami ukiumoortumik isiginnaartitsipput. Isiginnaartitsisut tassaapput meeqqanit 5-6-inik ukiulinnit utoqqalinersiaqalersimasunut. Oqiliallaataasorli tassaavoq malugineqarsinnaammat peqatigiiffimmi qanoq ukioqarneq apeqqutaanngilluinnartoq. Nalissaqanngitsumik ataqatigiinnerat malunnartorujussuuvoq.
Takutitani arlalinni tunngaviuvoq imminut ilaarutigineq, tamannalu N.A.I.P.-miut torrallavillugu takutittarpaat. Quianartorujussuupput, kalaallisullu paasisinnaanngikkaluaraanniluunniit malugilernartarpoq nipituumik illarluni.
Isiginnaartitsineq eqqissisimasumik ingerlanneqarpoq isiginnaartit arlaleriarluni orninneqartarlutik. Takutitat tamarmik torrallavinneqanngillat isiginnaartitsinerlu isumassamisut takutinneqarpoq, tassa qungujunnartumik minnerunngitsumillu inuppalaartumik. Tunngavissaqarluarpoq N.A.I.P. ukiut tamaasa isiginnaartitsigaangat tamatigut isiginnaartitsisarfiup ulikkaavittarneranut.
Unnummi assigiinngitsunik takutitsisoqarpoq tivanermik, quiasaarinermik, atisanik takutitsinermik, isiginnaartitsinermik, mavedansernermik aamma kalattoornermik. Aamma pinnguaat nuannarineqartoq, Kendamaen, immikkut takutinneqarpoq, tassani meeqqat utoqqartut atisalersorsimasut paasiniarlugu taanna qanoq atorneqartarnersoq.
Unnuk taanna akunniliisartuuvoq N.A.I.P.-p siulittaasua Ane Berthelsen, ukiorpassuarni peqatigiiffimmi ilaasortaasimasoq. Eqqissisimasumik quianartumillu takutitassat assigiinngitsut ilisaritittarpai. scenemi nikinnerit pinnguarnertut pilersillugit. Anep piffissaq iluatsillugu peqatigiiffimmut isiginnaartitsinermillu aningaasaliisut qutsavigai.
Piumassutsiminnik aliikkusersuisartut 60-it missaanniittut isiginnaartunik 500-t missaanniittunik aliikkusersuipput, isiginnaartullu puigukkiussassaminnik unnussiorput. Arfininngornermi unnukkut N.A.I.P. Katuami inissani tamakkerlugit nungunneqareersimasuni isiginnaartitseqqissapput.