Uumasuusivik
Qungasersuup toqunneqarnera malinnaaffigineqangaatsiartoq
Qungasersuup Mariusip Københavnip uumasuusuviani toqunneqartoq nunanit assigiinngitsorpassuarnit malinnaaffigineqarpoq
Uumasuusivimmi Københavns Zoo-mi qungasersuup Mariusip sapaammi uumasuusivimmi sulisumit toqunneqartoq nunarsuarmi tusagassiuutinit assigiinngitsorpassuarnit malinnaaffigineqarpoq.
Naak uumasuusivimmi sulisut pisoq pillugu akerlerineqarlutillu siorasaarneqartaraluartut, qungasersuumik toqutsineq uumasuusivimmit Københavns Zoo-mit annikinnerusumik oqaluuserineqalernavianngilaq.
Bengt Holst uumasuusivimmi Københavns Zoo-mi ilisimatusarnermut pisortaq oqarpoq.
- Pisimasoq misissoqqissaarparput, uumasunik suliaqarnerput allanngortinnavianngilarput tassami eqqortumik iliorpugut. Aamma ammasumik iliuuseqarnerput allanngortissanngilarput.
- Iliuuserisartakkagut ammasumik saqqummiuttarpagut, uumasuutigullu amerlavallaalerpata ikilisaaniarluta uumasuutitsinnik toqutsisariaqartarpugut, aamma taanna periuserput ingerlatiinnassavarput, Bengt Holst oqarpoq.
Qungasersuarli Mariusip toqunneqarnera taama malinnaaffigineqartigissasoq ilimagineqanngikkaluarpoq.
- Akerliusoqarnissaa ilimagereerparput, kisiat taama akerliusoqartiginissaa ilimaginngilluinnaraluarparput. Akerliuneq tallimanngornermi sakkortutsippoq akuerineqarsinnaanngitsumik, Bengt Holst oqarpoq.
Ilaatigut elektronikkikkoorlugu siorasaarneqarsimavoq, ilaatigut allaffigitissimalluni ilaqutai ilanngullugit toqunneqarumaartut siorasaartilluni.
- Akerliusoqarsinnaavoq, oqallittoqarsinnaavoq siorasaarneqarusunngilangali toqutaassasunga ilaquttakka ilanngullugit. Killissaq tassuuna qaangerneqarpoq, pisortaq oqarpoq.
Uumasuusivik Københavns Zoo sapaammi ammarmat, uumasuusiviup silataani inuit akerliusut 15-it missaanniittut qungasersuumik Mariusimik toqutsineq akerliunertik takutippaat.
- Oqaluunniaraluarpakka. Akerliusut ilaat oqaluutilluarpakka, ilaalli nuanninngitsunik uannut uumasuusivillu pillugu nuanninngitsunik suaartarlutik, Bengt Holst oqarpoq.
Bengt Holstip naatsorsuutigigaa qungasersuumik toqutsineq pillugu oqallinneq sapaatit akunneri tulliuttuni annikilliartulerumaartoq.
Mariusip neqai løvenut tunniunneqarput ilaallu nannunut tunniunneqarlutik.