tillinniarneq
Qummoroortartut tillinneqartut 700 kiilut nassaarineqartut
Nuummi Qinngutsinni qummoroortartut tillinneqartut affaat nassaarineqarput. Sinneri nassaariniarlugit politiit ikioqqupput
Qummoroortartut 1,5 tonsiusunit 700 kiilut, pingasunngornerup unnuaani Qinngutsinni containerimi tillinneqartut nassaarineqarput.
Nuussuarmi inissiaqarfimmi qummoroortartut quimi toqqorneqarsimapput.
- Ernumassutigisatsitut taakku isumannanngilluinnartumik toqqorneqarsimapput, politiineersoq Søren Bendtsen oqarpoq.
Atuaruk: Nuummi qummoroortaaterpassuarnik tillinniartoqartoq
Inuunermut ulorianartorsiortitsisinnaasut
Isumannaallisaanermut qummoroortunut taama amerlatigisunut killigititaq nalinginnaasumik kilometerip affaanik ungasissusilimmiittussaavoq, kisianni uani illut akornanni quimiitinneqarput.
- Qaarsimasuugunik kinguneqartitserujussuarsimasinnaagaluarput, politiineersoq oqarpoq.
Tamanna tunuliaqutigalugu aamma sinneri nassaarinissaannut innuttaasunut kajumissaaruteqarpoq. Taakku sinneruttut aamma illersorneqarsinnaanngitsumik inissisimanissaat, politiit ernummatigaat.
Atuaruk: Qummoroortaatit tillinneqartut qaarsinnaasut
Sinneri tuaviornerpaamik nassaariniaraat
Innuttaasunit saaffiginninnerit aamma misissuinerit, politiit qummoroortartunik nassaarnerannik kinguneqartitsipput. Ippassaq unnukkut quiminngaanniit qatserisartut ikiorsiullugit nuunneqarput.
Qummoroortartut tillinneqartut sinnerinut tunngatillugu politiit misissugassaqarput. Kisianni politiit saaffiginnissutinik suli pisariaqartitsipput, qummoroortartut ulorianartut tuaviornerpaamik qulakkeerneqarniassammata.
- Taakkunannga tillittut nammineerlutik qummoroortartut taama amerlatigisut qanoq ulorianartiginersut ilisimagunanngilaat, Søren Bendtsen oqarpoq.