tyveri
Qummoroortartut pillugit suliami arlallit tigusarineqartut
Qummoroortartunik tillinniarnermut atatillugu inuit arlallit tigusarineqarput. Qummoroortut affaat politiit suli amigaatigaat.
Nuummi Qinngutsinni qummoroortartut 1,5 tonsit tillinneqarneranut atatillugu politiit arlalinnik tigusarinnipput. Politiineersoq Brian Thomsen taama ilisimatitsivoq.
Politiit ippassaq unnukkut qummoroortartut affaat ataatilaarlugit, tassa 700 kiilut, Nuussuarmi quimi nassaarinerisa kingorna tigusarinninnerit pipput.
Politiit maanna tigusarineqartut qassiunerinik ilisimatitserusunngikkallarput.
Tamatuma peqatigisaanik misissuineq nanginneqarpoq, qummoroortullu sinneri nassaarineqarnissaat ukkatarineqarneruvoq.
- Tassunga atatillugu innuttaasut uagutsinnut saaffiginneqqullugit kaammattorusuppagut, Brian Thomsen oqarpoq.
- Tillittunut ilisimasaqaraanni, aamma qummoroortunik tuniniaasunik tusagaqaraanni imaluunniit qummoroortut sinneri sumiinnerinik saaffiginnissutissaqaraanni nalunaartoqassaaq.
Ippassaq 700 kiilut nassaarineqartut, najugaqarfiummut qanittunnguami quimi nassaarineqarput. Qummoroortartunut taama amerlatigisunut isumannaallisaanermut killigititaq kilometerip affaanik ungasissuseqarpoq.