Politiit mianersoqqusipput:
Qummoroortarnermut anori akornutaassaaq
Ukiortaami kitaani anorersuarnissaa ulorianartumik kinguneqarsinnaavoq.
Anorersuarnissaa, anoraasuarnissaa sumiiffiillu ilaanni anoraasuarsuartut sakkortutigisumik anorlissammat qummoroortartunik aallartitsinissami ajortoqarsinnaaneranik politiit misanersoqqusipput.
- Ukiutoqqap unnuaani anorersuartussaavoq, annermik Kalaallit Nunaata kitaani. Tamanna tunngavigalugu politiit mianersorluarnissassinnut innersuussipput, qummoroortarnermi anori allamut saatsitseriataarsinnaasarmat, politiit facebookiminni allapput.
Kitaani kujataanilu anorlernerpaaffiussasoq silasiortut ilimasaarutigaat.
- Kitaani kujataanilu suffarissaaq anorsarissallunilu. Tunullu kujataani natsimassaaq anorersuassalluni anoraasuarsuartut sakkortutigisumik anorsarittarsinnaajumaarluni, DMI ilimasaarivoq.
Atuaruk: Savalimmiuni ulussaarsuup marloriaataanik sakkortussusilimmik anorlertoq
Norgemi silasiortartut ilimasaarutaat aamma taamaappoq. Nuummut ilimasaarutaa imaappoq:
- Natsimassaaq sakkortuumik, 20 m/s kujasik-kangisimmik anorsarissalluni, yr.no ilimasaarivoq.
Isarussat eqqaamallugit
Qummoroortarnermi sapinngisamik sillimaniarnermi maleruagassat malinneqassasut politiit kaammattuipput.
- Aammalu qummoroortartillusi isiginnaartuinnaagaluarussiluunniit isarussat illersuutitut naleqquttut atorneqarnissaat innersuutigaarput pingaaruteqarluarmata, Kalaallit Nunaanni politiit allapput.