Michael Binzer
Qulimiguulinnik timmisartuutileqatigiiffimmi nutaami Binzer siulersuisuni ilaasortaalerpoq
Kalaallit Nunaanni inuussutissarsiornermi ilisarisimaneqarluartoq Michael Binzer, Tasiilami qulimiguulinnik timmisartuutileqatigiiffimmi siulersuisuni ilaasortanngorpoq
Tele-Postimi pisortaanerusimasoq Michael Binzer, Tasiilami qulimiguulinnik timmisartuutileqatigiiffimmi aallartinneqaqqammersumi siulersuisuni ilaasortanngorpoq.
Timmisartuutileqatigiiffik GreenlandCopter tusagassiutinut nalunaaruteqarpoq.
- Michael Binzer silaannakkut timmisartuussinernik misilittagartuujuvoq. GreenlandCopterip misilittagaqarluartumik ilaasortaqarnissani pingaartitaraa suliffeqarfiup ineriartornera eqqarsaatigalugu, suliffeqarfiup pisortaa Tim Nicolaisen tusagassiutinut nalunaarummi allappoq.
Misilittagaqarluartoq
Nangipporlu:
- Accountable Manageritut Michael Binzer misilittagaqarluarpoq. Tassani isumannaallissaanermut kiisalu Angallannermut Aqutsisoqarfiup maleruagassaanut misilittagaqarluartuuvoq. Suliffeqarfiup ineriartornerani Michael Binzer tassuunatigut iluaqutaassaaq.
GreenlandCopter Tasiilami qulimiguulinnik timmisartuussisartutut aallarteqqammerpoq. Tassani helikopterimik sisorariartunut angallassinerit, qulimiguulimmik takornariartitsinerit takornarianillu sullissisartuussalluni. Aamma Tunumi angallannikkut suliassanik suliaqartassaaq, timmisartuutileqatigiiffik ilisimatitsivoq.
Suliffeqarfimmi pisortaavoq Tim Nicolaisen, siulersuisuni siulittaasuuvoq Kelly Nicolaisen, siulersuisunilu ilaasortaapput Mike Nicolaisen, Yewlin Tay aamma Michael Binzer.