Qujaukitsup uuliamut isumalluartuunnginneq akerlilerpaa

Suliffeqarfiit uuliasiortartut uuliap akiisa appariartuinnartut kingunerisaannik sipaarniarput, ilaatigullu aningaasaliinerit unitsikkallarlugit.

Taamaakkarluartoq aningaasaqarnermut, aatsitassanut aamma nunanut allanut naalakkersuisoq, Vittus Qujaukitsoq (S), uuliasiorlualernissaq eqqarsaatigalugu neriulluarpoq, Finans.dk taama allappoq.

Pingaartuunngitsoq
Taanna isumaqanngilaq, maanna uuliap akia appasissoq uuliasiortut Kalaallit Nunaannut soqutiginninnerannut pingaartuunngitsoq.

- Uuliasiornermut sulianut aningaasaliinerit ungasissumut isigaluni aningaasaliinerupput. Amerlanertigut aningaasaliissutit ukiut 20-t qaangiukkaangata aatsaat matussuserneqartarput. Piffissami tassani suliffeqarfiit qularnernik kisissaanngitsunik aalajangiisarput - amerlanertigut avataaneersunut. Taamaammanuna ungasissumut isigaluta periusissamik allanngorartuunngitsumik aamma ersarissunik malittarisassalimmik peqartugut, ingerlatsiviit politikkikkut tunaartaasunut ernumassutissaqannginniassammata, Vittus Qujaukitsoq, nittartakkami aviisimut oqarpoq.

Periusissiatut pilersaarut
Taassuma aamma oqaatigaa, Naalakkersuisut 2014-2018-mut pilersaarummik Kalaallit Nunaat qanoq ililluni uuliasiortunik Nunatsinnut aningaasaliisarnerat attatiinnarneqarnissaanik allaatiginninnertalimmik akuersisimasut.

- Suliniutigut suliniummit katitertakkamit angisoorsuarmit ikkussortagaq mikisunnguatut assersuutaasariaqarput, aammalu nunarsuup aningaasaqarneranut maleruuttariaqarpugut, tunisat aammalu piumaneqarnerat aallaavigalugit. Kisianni soorunami akit piumaneqassutsillu annertunerutillugu aningaasaliititsiuminarneruvoq, taanna ilanngullug Finans.dk-mut oqarpoq.

Atuaruk: Qanittukkut uuliasiortoqassagunanngilaq