Pituffik

Qujaukitsup Danmarki isornartorsiorpaa: Iliuuserineqartoq toqqissisimanartinngilara

Nunanut allanut tunngasunut naalakkersuisup Vittus Qujaukitsup Pituffik pillugu suliami Danmarkip suleriusaa isornartorsiorpaa. Washington D.C-miinneranut suut angusaqarfigisimanerai suli oqaaseqarfigineqanngillat

Nunanut allanut tunngasunut naalakkersuisoq, Siumumit Vittus Qujaukitsoq

Nunanullu allanut Naalakkersuisoq, Siumumit Vittus Qujaukitsoq, Washington D.C-meeqqammerpoq. Tassani USA-mi illersornissamut naalakkersuisoqarfianit kiisalu nunanut allanut ministeriaqarfimmi atorfeqartut Pituffimmi kiffartuussinissamut isumaqatigiissut pillugu ataatsimeeqatigai.

Tusagassiuutinut nalunaarummi Danmarki isornartorsiorpaa:

- Danskit nunanut allanut ministeriat ullumi sivikitsumik ataatsimeeqatigaara, aammalu paasissutissat nutaat tupaallaatigisimallugit oqaatigalugu. Paasissutissat nutaat toqqammavigalugit killiffik toqqissisimanartinngilara.

- Nunanut allanut ministerip erseqqissaatigaa Danmarkip USA-llu akornanni, Kalaallit Nunaat akuutinnagu, immikkut oqaloqatigiittoqartarsimanera pillugu suliaq qulaajaaffigitilersimallugu., tusagassiuutinut nalunaarummi Vittus Qujaukitsoq oqarpoq.

.Tusagassiutit aqqutigalugit ullumi (pingasunngornermi) paasivara danskit nunanut allanut ministeriaqarfiat juulimi 2014-mi immikkut USA-mik oqaloqateqartarsimasut, tassanilu danskit-kalaallit suliffeqarfiisa qinnuteqarsinnaanerannik akuersissuteqartarnermut Kalaallit Nunaat akuutinneqarsimanngitsoq

Vittus Qujaukitsup Inatsisartut Nunanut Allanut Sillimaniarnermullu Ataatsimiititaliaat tallimanngorpat ilisimatitsilluni ataatsimeeqateqassaaq, tassanilu suliap ineriartornera pillugu oqaloqatigiinnittoqassaaq.

USA-mut angalanermi angusat
Nunanut allanut Naalakkersuisup USA-mut angalasimanera pillugu Sermitsiaq.AG-p apersorusukkaluarpaa, tamannali iluatsinngilaq. Naalakkersuisusup Washington D.C-miinnermini suut angusimanerai aaqqissuisoqarfimmit paaserusunneqarpoq. Pituffimmi isumaqatigiissutip annaaneraqarnera Naalakkersuisunit aamma pisooqataaffigineqarnersoq paaserusunneqaraluarpoq, kiisalu Inuit Ataqatigiinnit isornartorsiuisoqarnera qanoq oqaaseqarfigineqarnersoq paaserusunneqarluni. Inuit Ataqatigiinnit isornartorsiuipput oqarlutik danskit naalakkersuisui kiisalu Naalakkersuisut nassuiaasariaqartut. Suliaq aamma kanngunarsiartortutut IA-mit oqaatigaat.

Naalakkersuisut aamma qanoq iliuuseqaqqissanersut aaqqissuisoqarfimmit paaserusunneqarpoq.

Namminersorlutik Oqartussat suliami aamma misissuiffigineqarnissaanni sumulluunniit attuumassuteqanngitsumik misissuisoqarnissaa Inuit Ataqatigiinnit piumasarineqarpoq, isumaqarpummi Naalakkersuisut namminneq misissuinissatut toqqagaat sumulluunniit attuumassuteqanngitsuusoq.

Powered by Labrador CMS