Pituffik

Qujaukitsoq: Thulemut isumaqatigiissut Naalakkersuisuusimasut pingaartissimanngilaat

Nunanut allanut tunngasunut Naalakkersuisup Vittus Qujaukitsup, 2013-imi Naalakkersuisunut ilaasortaasimasup, nassuerutigaa Thule Air Basemi (Pituffimmi) kiffartuussinissamik isumaqatigiissut Naalakkersuisuusimasut pingaartissimanngikkaat

Thule Air Basemi (Pituffimmi) kiffartuussinissamik isumaqatigiissut Naalakkersuisuusimasut pingaartissimanngilaat, Vittus Qujaukitsoq nassuerpoq

– Nassuerutigissavara 2013-imi Naalakkersuisut Pittuffimmut kiffartuussinissamik isumaqatigiissut pingaartippallaarsimanngimmassuk. Taamatut tallimanngormat KNR-mut oqarpoq Vittus Qujaukitsoq, tamannalu peqatigalugu nassuerutigalugu taamanikkut atorfillit Thule Air Base-mut (Pituffimmut) paasissutissat ingerlateqqinnissaat aamma pingaartippallaarsimanngikkaat.

Vittus Qujaukitsoq taamatut oqarpoq Danmarkip Thule Air Base-mut tunngasumik suliarinninnera pingasunngormat isornartorsioreerlugu.

Pisimasoq misissorneqarpoq

Vittus Qujaukitsup KNR-mut uppernarsarpaa pisimasoq misissoqqissaarneqalersoq, paasiniarlugu sooq atorfillit suliassaq tamanna pillugu Naalakkersuisunut iluamik paasissutissiisimannginnersut.

– Maannangaaq oqaatigisinnaanngilara atorfillit taamanikkut sooq Pituffimmut tunngasumik Naalakkersuisunut paasissutissiisimannginnersut, Nunanut allanut Tunngasunut Naalakkersuisoq Vittus Qujaukitsoq KNR-mut oqarpoq.

Vittus Qujaukitsup ilanngullugu oqaatigaa tamanna pillugu qallunaat nunanut allanut tunngasunut ministeriat Martin Lidegaard marlunngorpat ataatsimeeqatigissallugu.

Powered by Labrador CMS