Royal Greenland

Quersualerisutut ukiunik 40-unngortorsiortoq

Stephen Hansen, Qasigiannguit, Royal Greenlandimi ukiuni 40-ni quersualerisutut sulisimavoq

Stephen Hansen Qasigiannguit, ukiuni 40-ni Royal Greenlandimi quersualerisitut sulivoq

Quersualerisoq Stephen Hansen 16-iinnarnik ukioqarluni Qasigiannguani suliffissuarmi sulilerpoq, taamanikkut Kongelige Grønlandske Handelimi, ullumikkut Royal Greenlandiusumi.

Taanna inuunermini suliffituarisimavaa ukioq mannalu ukiunik 40-unngortorsiorluni nalliuttorsiorpoq.

– Taamanikkut raajaleriffimmi sulilerpunga. Taananikkut inuit sinerissamiit Qasigianngualiaasarput raajalerifimmi suliartorlutik. Taamanikkut raajaleriffimmi sulinermi pissutsit allaanerupput, sulinitsinnilu kukkugaangatta tamanna ilinniutigisarparput, Stephen Hansen RG.gl-imut oqaluttuarpoq.

Sorpassuit aquppai

Stephen Hansenip tamatigut raajanik qerisunik peqqumaasivik nakkutigisarsimavaa. Tamatuma saniatigut isumagisartussaavaa raajat aatsinneranni malittarisassat malinneqarnissaat. Ullumikkut suliffissuarmi qaleralinnik tunisassiorfiusumi quersualerisutut suli sulivoq, poortuutissat, sulinermi atisat il.il. nakkutigisaralugit.

Royal Greenlandip oqaatigaa taanna sulisartutut aalajaatsutut allatulli piffissap ingerlanerani assigiinngitsunik pikkorissartarsimasoq, suliffissuarmilu tatigisaalluni sulisuusoq assigiinngitsunik akisussaaffeqarluni, ilaatigut quersuarmi suleqatigiit qullersaattut.

Powered by Labrador CMS