ilaqutariinnut festivali
Qooqqut festivali ingerlanneqaleruttorpoq
Ilaqutariiinnut festivali Qooqqut Festival, siullermeerluni ingerlanneqartoq, Nuup Kangerluani aallarteqqammerpoq
Kulturip illorsuata Katuap, Qooqqut Nuan aamma Arctic Umiaq Line A/S suleqatigalugit, festivali imigassartorfiunngitsoq septembarip 11-aniit 13-at ilanngullugu pisussaq aaqqissuuppaa.
Ilaqutariinnut festivali ippassaq tallimanngornermi ualikkut ammarneqarmat allunaariaqattaarnerit aliikkusersoqatigiinnerlu erinarsoqatigiinnertalik, oqaluttuarnertalik Didallu tusarnaartitsineranik imalik ingerlanneqarput.
Sammisassarpassuit
Qooqqut Festival ullumi peqataasunut sammisassarpassuarnik aaqqissuussiviuvoq, pisussat nal. 10 aallartillutik, ilaatigut ilaqutariinnut timersornermik eqqumiitsuliornermillu sammisassaqartitsilluni.
Kingusinnerusukkut Dida peqatigalugu erinarsoqattaartoqassaaq kiisalu pisissaarneq, qaannamik sungiusaatit, høvdingebold, stafet, mini maraton qitinnerlu ingerlanneqassallutik.
Qooqqut Festivalimi pisussat allattorsimaffiat tamaa Katuaq.gl-imi takuuk.
Nipilersortorpassuit
Unnugu aliikkusersuinerit nipilersornerillu pissapput, ilaatigut Maalia aamma Rosa, Dariisiatut ilisimaneqartoq, aliikkusersuissallutik. Erinarsortartoq inuusuttoq Nikolaj Lønstrup tusarnaartitsissaaq, Maalia Juunalu Ilulissaneersut tusarnaartitsissallutik kiisalu Martin aamma Godmand kalattuunik nipilersussallutik.
Aamma Ajinai Mongoliameersoq Mongoliamiut nipilersugatoqaannik appisimaassaaq. Kodamit nersornaaserneqartoq Jenseeraq Olsen Qooqqut Festivalimi unnugu pingaarnertut inuttaassaaq.
Ilaqutariinnut festivali aqagu sapaammi naggaserlugu 2 kilometerinut ataatsimut arpaqatigiinnermik naggaserneqassaaq.