outervision
Qitinnermik pikialaartitsinerup angalasoqarnissaa ilisimatitsissutigaa
Nunatta kujasissortaani Paamiut illoqarfinnit siullersaalluni orninneqassaaq, tamaani inuusuttut qitinnermik pikkorissarnissaminnut periarfissaqassapput
Ukiut sisamassaannik qitinnermik pikialaartitsineq nuannarineqarluartoq OuterVision Nunatsinni ingerlanneqassaaq.
Ukioq manna sineriak kujasinnerusoq qitittartunit Norgemeersunit, Sverigemit aamma Nunatsinni tikeraarneqassaaq illoqarfiit Paamiut, Nanortalik, Narsaq, Qaqortoq aamma Nuuk ilinniartitsivigineqarlutik.
OuterVisionimit qitinnermik ilinniarnerit akeqanngitsut neqeroorutigineqassallutik qiteriaatsini hiphop, uaajeerneq, jazz, inngerneq, ballet allarpassuillu. Ilinniartitsisuussapput Varste Berndtsson, Alexander Montgomery-Andersen, Charlotte Andreasson, Henriette Olsen, Hivshu Pierry aamma Kristoffer Solberg.
Illoqarfiit tikinneqartussat siullersaraat Paamiut tamaani aggustip 21-anni qitittoqassaaq, tikiffissaq tulleq tassaalluni Nuuk tamaani septembarip pingajuannit tallimaanut qitittoqassalluni.
OuterVision 2010-mi Nuummi aallartinneqarpoq ukiut kingulliit marluk illoqarfiit Ilulissat, Uummannaq, Paamiut, Tasiilaq, Sisimiut aamma Nuuk ilinniartitsivigineqartarlutik. Peqataaneq akeqanngilaq kalaallit oqaasii Norgemiusut imaluunniit tuluit oqaasii pikkorissarnermi atorneqarput.