Aasiaat

Qipoqqaat mattussaaqqasut imarnersanut pingasunut avissimapput

Qipoqqaat qulit missaaniittut, Aasiaat eqqaani imarnersami tallimanngornermi mattussaaqqasut, maanna imarnersanut pingasunut avissaarsimasut, ataasinngornermi ilisimatitsissutigineqarpoq

Jørgen Isak Olsen, Aalisarnermut, Piniarnermut Nunalerinermullu Naalakkersuisoqarfimmi pisortaq

Qipoqqaat qulit tungaanut amerlassuseqartut, Aasianniit avannamut 5 kilomeriterit missaani ungasitsigisumi imarnersami tallimanngornermi mattussaaqqasut, maanna imarnersanut pingasunut aggulussimapput.

Taama Aalisarnermut, Piniarnermut, Nunalerinermullu Naalakkersuisoqarfik, qipoqqaat mattussaaqqasut pillugit qanimut malinnaasoq ilisimatitsivoq.

- Aasianniit nalunaarutigineqartut naapertorlugit siku suli aalaakkaasuunngilaq, taamaattumik qipoqqaat suli orninneqarsimanngillat, aamma piniartut tamaani angalaarnissaq ulorianartutut nalilermassuk, Jørgen Isak Olsen, Naalakkersuisoqarfimmi pisortaq Sermitsiaq.AG-mut oqarpoq.

Atuaruk: Qipoqqaat qulit missaanniittut sikkussaasut

Atuaruk: Nuna tamakkerlugu arfernik angisuunik arfattassat

Qipoqqaat, illoqarfiup avatinnguani, avataata sikuinit tulalersunit immallu sikujartornera ilutigalugu imarnersani mattussaaqqapput.

Nunatta kitaani qipoqqaat 2015-mi pisarineqarsinnaasut quliupput. Qipoqqarnik pisaqarnissamut akuersissutillit kisimik pisaqarsinnaatitaapput januaarip aallaqqaataanit decembarip 31-at ilanngullugu.

Aasiaat avannaani qipoqqaat imarnersani mattussaasut assiutigigukkit redaktion@sermitsiaq.ag-mut nassiussinnaavatit. Qanga assilineqarsimanersoq aamma kiap assilisimaneraa allaqqassaaq

Atuaruk: Danmarkimi qipoqqaat siumorneqartut

Powered by Labrador CMS