arferit
Qipoqqaat 12-t aappaagu pisarineqarsinnaapput
Arfernut angisuunut pisassiissutit inissinneqarput. Taamaattorli suli allannguuteqartoqarsinnaavoq
Kitaani 2018-imi qiporartassat katillugit 12-iupput. Pisassiissutaasut quliupput, ukiormannalu pisarineqanngitsoortut marluk ilanngunneqarput. Angallatit qipoqqarniarnissamut teknikkikkut piumasaqaatinik nalunaarutini ataani taaneqartunik naammassinnissimasutut akuerineqarsimasut januarip aallaqqaataaniit decembarip 31-anut qipoqqarniarsinnaapput.
Pisassiissutit agguaanneqarneri Aalisarnermut Piniarnermullu Naalakkersuisumit akuerineqarpoq.
Qeqertarsuup Tunuanit kujammut taamaallaat
Qaanaaq, Upernavik, Uummannaq, Qasigiannguit, Qeqertarsuaq aamma Nanortalik 1. januar 2018-imi akuerineqartunik tuukkartalinnik qamutililinnik angallateqanngillat, taamaattumik qipoqqaat taamaallaat Qeqertarsuup Tunuaniit kujammut pisarineqarsinnaapput.
Kalaallit Nunaata Kitaani qipoqqaqqiissutit qamutililinnut kisimi agguaanneqartarput, nunatta kitaani aqutsiveqarfiit tamarmik qipoqqaqatigiit ataaseq piniartarpaat. Siornatigut pisassiissutit Aalisarnermut Piniarnermut Naalakkersuisoqarfimmit kommuninut sisamanut agguaanneqartarput, taamaasillutillu makitsillutik iml paarlakaajaallutik pisassiissutit kommunit iluminni qamutililinnut agguaassisarlutik.
2018-imi nunatta kitaani ataatsimoortumik pisassiissutaasaaq, soorlu tikaagulliusaat, tikaagulliit aamma arfiviit taamannak agguaanneqartartut.
Tikaagulliusaaq, arfivik aamma tikaagullik
Kitaanut 2018-imi pisassiissutit tamakkerlugit tikaagulliusaat 19-upput. Angallatit tikaagulliusaarniarnissamut teknikkikkut piumasaqaatinik naammassinnissimasutut akuerineqarsimasut 1. januarimiit 31. decemberimut tikaagulliusaarniarsinnaapput. Piniarnerup isumannaatsumik ingerlanneqarnissaa eqqanaarniarlugu ukiut siuliinitut piumasaqaatinik piumasaqartoqassaaq Namminersorlutik Oqartussat, Kommunit aamma piniartut akornanni suleqatigiilluarnissamik piumasaqartumik.
Malugeqquneqarpoq arfivik Nunatta sinnerani eqqissisimatitaammat.
2018-imi Kitaani tikaagullittassat tamakkerlutik 164-iupput, Tunumi 12-iullutik.
Kalaallit Nunaata arfernik angisuunik pisassai Arfanniarnermut Ataatsimiititaliarsuup (IWC), pisassiissutit angissusissaannik aalajangiisartuusup, siunnersuuteqarnera tunngavigalugu aalajangerneqartarput. Ukiunut 4-nut atuuttumik tikaagulliusaanik, arfivinnik, qipoqqarnik Kitaanilu tikaagullinnut kiisalu Tunumi tikaagullinnut pisassiissutit 2015-2018-imut atuuppoq.
Ukioq pisassiiffiusoq qaangiukkaangat nalilersuisoqartassaaq, ukiup pisassiiffiusussap tullia nutaamik siunnersuisoqarsimatillugu qaangiisoqarsimatilluguluunniit aaqqiivigineqartassallutik.
Arfiviit tikaagulliillu agguaanneqarnerisa tusarniaassutigineqarnerat januaarip affaani siullermi 2018-imi pissaaq.