københavn
Qiperoq ammaqqippoq nutaanillu aqutsisoqalerluni
Qiperoq Københavnimiittoq apriilip aqqarnganni ammaqqissaaq, tassani ammaqqinnera malunnartinneqassalluni
Kalaallit inuuniarnermikkut ajornartorsiuteqartut ornittagaat Qiperoq Københavnimiittoq ukioq kingulleq novembarimi matusoq ammaqqissaaq,
- Nuannaarutigalugu nalunaarutigissavarput Pavia Høegh aamma Ann Dorthe Lunde kalaallit ornittagaanni aqutsisunngussammata, Kalaallit Illuutaat nalunaarpoq.
Qiperumut orniguttartut pitsaasumik tapersersorneqarnissaat siunersorneqartarnissaallu sulissutigisassavaat.
Inuusuttut annertunerusumik sullinneqalissapput
Inuusuttu inuuniarnermikkut ajornartorsiuteqartut Københavnimiittut ukiuni kingullerni amerlatsikkiartorput, taamaattumik Qiperup ammaqqinnerani inuusuttut sullinneqarnerat aamma annertunerulissaaq.
- Siornatigut inuusuttut annertunerusumik sullinneqarneq ajorput, tamannali iliuuseqarfigineqartariaqarpoq, Kalaallit Illuutaanni pisortaq Leise Johnsen oqarpoq. Kalaallit Illuutaata ornittarfiup ammaqqinnissaa sulissutigaa.
Ikiorsiisoqarnera pissutaalluni Qiperoq ammaqqinneqarpoq, ukiunilu sisamani ammanissaanut aningaasaliisoqarluni.
Apriilip aqqarnganni ammaqqissaaq
Qiperoq Københavnimi Skelbækgade 24a-mi inissisimasoq apriilip 22-anit atuisartunut ammassaaq, sapaatip akunneranut sisamariaq ammasassalluni.
Inunnik ikiuisartut Pôq aamma saaffigineqaqqissinnaanngussapput, Qiperup matunnginnerani piffissaritinneqartut malillugit.
Apriilip aqqarnganni Qiperoq ammaanersiorneqassaaq.