UNESCO
Qinnuteqaatit nassiupput
UNESCO ullumi nunarsuarmi kingornussassanut ilanngunneqarnissamut qinnuteqaatit tiguaat
Piniariartarfiup Aasivissuit - Nipisat UNESCO-p nunarsuarmiut eriagisassaattut allattorsimaffianut qinnuteqaatit piareerneqarlutillu ullumi nasiunneqarput.
- Nuannaarutigaara nunarput UNESCO-mut qinnuteqaammik pingajussaa nunarsuarmioqatigiit eriagisassaattut allattorsimaffiannut tunniussisinnaalersimammat, isumaqarpungalu neriuuteqarluarnissamut pissutissaqarluartugut. Qinnuteqaat assut kusanarluartumik suliarineqarsimasoq takuneqarsinnaavoq isumaqarpungalu toqqaaniarnermi isigineqarumaarluta, Ilinniartitaanermut, Kultureqarnermut, Ilisimatusarnermut Ilageeqarnermullu Naalakkersuisoq Doris Jakobsen tusagassiuutinut nalunaarummi allappoq.
Ilanngunneqarnissaanut piukkunnartoq
UNESCO-mut qinnuteqaatit Naalakkersuisut, Qeqqata Kommunia, Nunatta Katersugaasivia allagaateqarfialu Danmarkimilu kulturimut ministeriaqarfiup suleqatigiinnerisigut piviusunngortinneqarput.
Qinnuteqaatillu suliarineqarnerini innuttaasunik ataatsimiititsinerit, piniartunik ataatsimeeqateqarnerit suliamullu attuumassutillit naapinneqartarsimapput.
- Kalaallit Nunaanni piniariartarfissuaq asseqanngitsoq Aasivissuit - Nipisat nunarsuarmi kingornussassat allattorsimaffiannut ilanngunneqarnissamut piukkunnarluarpoq, Kulturminister Mette Bock oqarpoq.
Atuaruk: Piniariartarfiit UNESCO-p allattorsimaffianut ilanngutsinneqassapput
Qinnuteqaatit UNESCO-p nunarsuarmiut eriagisassanut komitévisa siusinnerpaamik 2018-mi aasakkut suliarissagaat naatsorsuutigineqarpoq. Aasarulu Kujatani kulturikkut nunataq allattorsimaffimmut ilanngunneqarnissaa neriuutigineqarluni.