Qinngasaarisarneq pillugu iliuuseqartoqaqqittoq

Mary Fonden aamma Red Barnet aprilip naalernerani Kammagiitta – Qinngasaarunnata aallarniutaasumik aamma nangitsiffiusumik pikkorissaatigissavaat. Pikkorissaasuussapput Lars Stilling Netteberg, Red Barnet aamma qinngasaaruttarneq pillugu ilisimatusartoq Helle Rabøl Hansen, Danmarks Pædagogiske Universitet, Nuummilu pinaveersaartitsinermik siunnersorti Arnaaraq Petersen, Kommuneqarfik Sermersooq. Pikkorissaanerni MIO saqqummiissaaq, nutaatut suliaqarfigiligartik Kammagiitta – Qinngasaarunnata eqqartussallugu.

Pikkorissaanerit pissapput kommunit ataasiakkat suleqatigalugit illoqarfinni ukunani: Nuuk, Sisimiut aamma Ilulissat.

Kammagiitta – Qinngasaarunnata Kalaallit Nunaanni ingerlanneqalerpoq 2011-mi, tassalu illoqarfinni nunaqarfinnilu amerlanerni atorneqarluni. Meeqqerivinni atuarfinnilu sulisut nutaat 2011-mi pikkorissaanernut peqataasimanngitsut maanna periarfissinneqassapput Kammagiitta – Qinngasaarunnatap teoriianut periaasianullu paasisaqarnissaminnik, MIO tusagassiutinut nalunaaruteqarpoq

Amerlanerusut periarfissinneqassapput
Ilisarititsinermik pikkorissarnerni meeqqeriviit, atuarfiit ilinniartullu nutaat aamma peqataassapput, taamaalillutik meeqqat amerlanerit Kammagiitta – Qinngasaarunnata siunissami iluaqutigilerniassammassuk. Pikkorissarnerni ingerlaqqiffiusuni meeqqerisut ilinniartitsisullu Kammagiitta – Qinngasaarunnata atorlugu suliaqartuusut qinngasaaruttarneq pillugu paasisat nutaat paasisaqarfigissavaat, nutaanillu isumassarsisinnaassallutik.

Nuuummi pikkorissaanermut atatillugu soraarnerup nalaani meeqqanik sullissaqartunut kikkunnullu tamanut allanut ammasumik ataatsimiisitsisoqassaaq. Soraarnerup nalaani ataatsimiinneq pissaaq ullumi pingasunngornermi nalunaaqutaq 16.15 Katuap inersuaaraani.