Qinikkanut kaammattuut: Aningaasaqarnissigut soqutigisasi saqqummiussigit

Atornerluisarnermut akiuiniaqatigiiffiup Transparency Greenlandip nuannaarutigaa Naalakkersuisuutitaqalersut nunatsinnik ammanerusumik ingerlatsiniarlutik siunnerfeqarnerat.

- Transparency International Greenlandimi nuannaarutigingaarlugu maluginiarparput, Naalakkersuisut nutaat naalakkersuisooqatigiinnissamik isumaqatigiissumminni ammanerusumik ingerlatsinissaq pillugu inatsisiliornissaq siunniummassuk.

Isumaqatigiissut tikkuussivoq imminut iluaqutissinniarluni pissaanermik atornerluineq akuerineqarusunngitsoq. Transparency Greenland isumaqarpoq, taamatut iliuuseqarneq nunatsinni innuttaasunut tamanut iluaqutaassasoq.

Taama atornerluisarnermut akiuiniaqatigiiffiup, Transparency Greenlandip siulittaasua Anita Hoffer tusagassiuutinut nalunaaruteqarluni allappoq.

Atuaruk: Peqquserlunnermut akiuiniarluni kaffillerneq

Atuaruk: Transparency: Kalaallit Nunaat politikkikkut ineriartorpoq

Politikerit paasissutissaataat saqqummiutsikkusuppaat
- Nuannerpoq takullugu Naalakkersuisuini ammanerusumik ingerlatsiniarluni qineqqusaarutit eqqaamaneqarsimammata aammalu qanoq ililluni piviusunngortinnianerlugit naalakkersuisooqatigiinnissamut isumaqatigiissummut ilanngunneqarmata, Anita Hoffer nangippoq.

Taamaattumik Transparency Greenlandimit maanna politikerinngorlaanut qinigaaqqittunullu kaammattuutigineqarpoq qinikkat aningaasaqarnermikkut suliffeqarnermikkullu soqutigisatik Inatsisartut nittartartagaatigut saqqummiutissagaat.

- Taamatuttaaq Transparency Greenlandimit neriuutigaarput Naalakkersuisut nutaat ukiuni kingulliunerusuni pissusinngoriartuaarsimasoq nangissagaat, tassalu Naalakkersuisuni Inatsisartunilu ilaasortat amerliartuinnartut suliatik aningaasatigullu soqutigisaqarfitik nalunaarutigisarmatigit, taamaalilluni ersarinnerulissammat suliani sorlerni suliarinneqataasinnaanngitsutut inissisimassanersut, Anita Hoffer erseqqissaavoq.

Atuaruk: Nunatsinni peqquserluttoqannginnissaa anguniarlugu annertunerusumik suliniartoqalersoq