Qinigaasinnaanermut ataatsimiititaliap 14-it qinigaasinnaanngitsutut aalajangiiffigaat

Qinigaasinnaanermut ataatsimiititaliap kommunalbestyrelsinut, nunaqarfinni aqutsisunut aamma ilagiit sinniisaannut qinersinerup 4. april 2017-p kingorna inuit 14-it qinigaasinnaanngitsutut aalajangiiffigaat.

Namminersorlutik Oqartussat tusagassiuutinut nalunaarummi taama allapput.

Ataatsimiititaliaq suliani ukunani qinigaasinnaanermut annaasaqartitsinermik aalajangiiffigineqarput:

Johannes Fly Qeqqata Kommuniani kommunalbestyrelsimi sinniisussatut qinigaasoq, qinigaasinnaanngilaq.

• 10. marts 2015 eqqartuussinermi Johannes Fly eqqartuunneqarpoq kr. 3.000-nik akiliisussanngorlugu makku pillugit:
• 1) Pinerluttulerinermi inatsimiittup § 61, imm. 1, nr. 1, naleqqiuguk § 104, imm. 1 unioqqutinneri – suliani marlunni peqquserluuteqarluni uppernarsaatissanik atornerluineq.

Carl Simonsen Narsarmijiini Ilagiit sinniisaanni ilaasortassatut qinigaasoq, qinigaasinnaanngilaq.

• 12. februar 2014 akileeqqussummut akuersinikkut Carl Simonsen kr. 500,00-nik akiliisussanngortitaavoq makku pillugit:
• 1) Pinerluttulerinermi inatsimmiittup § 111, imm. 1 unioqqutinnera – tillitanik atueqataaneq aamma
• 10. november 2016 eqqartuussinermi Carl Simonsen eqqartuunneqarpoq pineqaatissiinertaqanngitsumik ulluni 30-ni, ukiumik ataatsimik misiliiffigineqarluni makku pillugit:
• 2) Pinerluttulerinermi inatsimmiittup § 102 unioqqutinnera – tillinneq

Josva Motzfeldt Qeqertarsuatsiaani ilagiit sinniisaannut qinigaasoq, qinigaasinnaanngilaq.

• 30. oktober 2013 akileeqqussummut akuersimmat Josva Motzfeldt kr. 3.000,00-nik akileeqquneqarpoq, makku pillugit:
• 1) Pinerluttulerinermi inatsimmiittup § 98 unioqqutinnera – inuup allap inuuneranik sioorasaarineq

Regine Svendsen Qeqertarsuarmi ilagiit sinniisaannut ilaasortassatut qinigaasoq, qinigaasinnaanngilaq.

• 13. april 2016 eqqartuussinermi Regine Svendsen eqqartuunneqarpoq pineqaatissiinertaqanngitsumik ulluni 14-ni pinerluuteqarsimasunut inissiisarfimmut inissinneqarsinnaasoq kiisalu kr. 3.000,00-nik akiliisinneqassasoq makku pillugit:
• 1) Pinerluttulerinermi inatsimmiittup § 106, imm. 1, nr. 1 unioqqutinneqarnera – allap piinik imminut paarititanik peqquserluttuliorneq

Thomas Suersaq Savissivimmi nunaqarfimmi aqutsisunut qinigaasoq, qinigaasinnaanngilaq.

• 18. august 2015 eqqartuussinermi Thomas Suersaq eqqartuunneqarpoq pinerluuteqarsimasunut inissiisarfimmut ulluni 30-ni inissinneqassasoq, ukiumik ataatsimik misiliinermik ilallugu uku pillugit:
• 1) Pinerluttulerinermi inatsimmiittup § 88 unioqqutinneqarnera – nakuuserneq

Elias Larsen Nuussuarmi/Nutaarmiuni/Tasiusami nunaqarfinni aqutsisunut sinniisussatut qinigaasoq, qinigaasinnaanngilaq.

• 15. august 2012 eqqartuussinermi Elias Larsen eqqartuunneqarpoq pineqaatissiinertaqanngitsumik ulluni 15-ni pinerluuteqarsimasunut inissiisarfimmut inissinneqarsinnaasoq uku pillugit:
• 1) Pinerluttulerinermi inatsimmiittup § 88 unioqqutinnera – nakuuserneq

Isakki Isaksen Eqalugaarsunni/Saarlumi/Qassimiuni nunaqarfinni aqutsisunut sinnii-sussatut qinigaasoq, qinigaasinnaanngilaq.

• 22. april 2014 eqqartuussinermi Isakki Isaksen eqqartuunneqarpoq ukiup ataatsip misiliinertaqarfiusup iluani pineqaatissiinertaqanngitsumik pinerluuteqarsimasunut inissiisarfimmut ulluni 30-ni inissinneqarsinnaasoq makku pillugit:
• 1) Pinerluttulerinermi inatsimmiittup § 113, imm. 1 unioqqutinnera – pigisanik aseruineq
• 2) Pinerluttulerinermi inatsimmiittup § 102 unioqqutinnera - tillinneq

Karl Berthelsen Paamiuni ilagiit sinniisaannut qinigaasoq, qinigaasinnaanngilaq.

• 26. februar 2013 eqqartuussinermi, nunattalu eqqartuussiviani 30. december 2013 eqqartuussinikkut atortussanngortinneqartumi, Karl Berthelsen eqqartuunneqarpoq qaammatini sisamani pinerluuteqarsimasunut inissiisarfimmut inissinneqassasoq kiisalu pinerlineqartumut kr. 20.000-nik taarsiissuteqassasoq makku pillugit:
• 1) Pinerluttulerinermi inatsimmiittup § 77, imm. 1, nr. 1 unioqqutinnera – nakuusernissaq sioorasaarutigalugu pinngitsaaliilluni allatut kinguaassiutitigut atoqatiginninneq.

- Qinigaasinnaanermut ataatsimiititaliap aalajangigai inaarutaapput maalaarutigineqarsinnaanatillu, Qinigaasinnaanermut ataatsimiititaliaq allappoq.