Qinersivissat kingulliit qimussimik apuunneqartut
Tele-Postip, ullumi qinersisoqarnissaa sioqqullugu, pappiaqqat qinersivissat tamaasa Kalaallit Nunaanni qinersivinnut tamanut apuunneqarnissaat qulakkeerpaa
Tallimanngormat ualisoq Namminersorlutik Oqartussat Nunami Namminermi Immikkoortoqarfiata qinersisartut qinersivissaat tamarmik apuuffissaannut apuunneqarsimanerat naammangisimaarlugu allappoq.
- Maanna aaqqissuunneqareerpoq, Air Greenland sikup sinaanukaassissasoq. Tassani naapissavaat qimussit, nassiussamik Savissivimmut ingerlatitseqqittussat. Taama tallimanngornermi ualikkut Tele-Post Nunami Namminermi Immikkoortortamut Namminersorlutik Oqartussanut mailerpoq. Namminersorlutik Oqartussat tusagassiuutinut nalunaarummi allapput.
Arfininngornermi Pituffimmi Air Greenlandip stationslederiat Peter Lillie biilerluni 35 km amerikamiut campiat atorunnaarnikoq Camp Tuto ornippaa. Tassani nal. 18:30 pilersaarut malillugu naapippaa Savisissivimmioq piniartoq Markus Hansen. Markus pappiaqqat taasivissat qimussiminut usiliuteriarlugit ingerlaannaq 150 km. sermersuakkoorullugit Savissivimmut uterpoq.
Air Greenlandip aamma nunami najugaqarfiit avinngarusimanerpaasa ilaanni najugaqartut ikioqatigiinneq imaannaanngilluinnartoq pinerisigut aatsaat qulakkeerneqarsinnaasimavoq, pappiaqqat taasivissat taasiartorfimmut tassunga piffissaq eqqorlugu apuunnissaat, tusagassiuutinut nalunaarummi allassimavoq.
Angallatit (tamakkingajallugit)
Timmisartut, qulimiguullit, umiarsuit, umiatsiaq sukkasuuliaq, biilit, qamuteralaat qimussillu ulluni 14-ini kingullerni sulisimapput, marlunngornermi apriilip 24-ani qinersisoqannginnerani pappiaqqat taasivissat 43.000-it nunami sumiiffinnut tamanut apuunnissaat qulakkeerniarlugit.
Nassiussat tamarmik apuunnissaannut Tele-Post akisussaaffeqarpoq. Poortukkat Nuummiit 9. april ’Jetpost’-itut nassiunneqarput, taasiartorfinnulli 71-inut poortukkat 87-it nassiunneqarnerini ’jet’ kisimi atorneqanngingajappoq
- Qinersinermi atugassat nassiussornissaanut Tele-Post-ip akisussaaffia logistikkimi inuiaqatigiinnullu tunngasutigut suliassatta pingaarnerpaat ilagaat. Akisussaaffik tamanna ilisimalluinnarparput, taamaattumillu nassiussassat taakku suli iliuuseqarusunnerulersittarpaatigut, taama oqarpoq centerip pisortaa Susanne Kristensen, taassuma nassiussalerinermi aqutsisoq Aviaja Holm peqatigalugu qinersinermi atortussat piffissaq eqqorlugu apuunnissaat akisussaaffigaa.
Kujataani sikorsuit akornutaasut
Nassiussinerit tamarmik elektroniskimik malinnaavigineqarsimapput. Qaanaap tungaanut nassiussat Ilulissani unittoormata, Aviaja Holm aalajangipallappoq. Nassiussat Savissivimmut taamaallaat piffissaq eqqorlugu anngussinnaapput, nassiussat Pituffimmut nassiunneqartussanngorpata. Nalunaarut Ilulissani allakkerivimmut nassiunneqarpoq. Periataallaqqinnerup tamatuma taamaallaat periarfissaalersippaa, Tele-Post-ip tallimanngorneq ualikkut Savissivimmut nassiussat apuunnissaat qulakkeerneqarnerat.
Aamma Kujataani unammillernartoqarsimavoq. Silap ajornera pissutigalugu. Tamanna isumaqarpoq, sapaatip akunnerani Qaqortumut Arsummullu qulimiguulimmik timminissaq pingasunngornermi apriilip 18-ianni unitsinneqartariaqarsimaneranik. Taarsiullugu nassiussat Royal Arctic Line-p sumiiffimmi umiarsuaanut pajuttaammukaanneqarput, sapaammilu apriilip 22-ani pappiaqqat taasivissat Arsummut aqqusaarunneqarlutik. Nunami najugaqarfiit kujasinnerpaartaannut Nanortaliup eqqaanut nassiussat piffissaq eqqorlugu apuunnissaat qulakkeerniarlugu Tele-Post ilaatigut umiatsiamik sukkasuuliamik attartortariaqarsimavoq ilaatigut Tele attartoriigaanut immikkuullaarissumik iliortoqarpoq timmisartuussinermi pappilissat taasivissat Alluitsup Paanut nassarneqarmata.