Aleqap atornerluinera

Qinersisoqalernera pissutaalluni misissuinissaq unitsinneqarpoq

Kukkunersiuinermik suliaqartut Naalakkersuisut aningaasanik atuisimanerat misissuinissaraluat unitsinneqassaaq Inatsisartunut qinersisoqartussaanera pissutaalluni

Naalakkersuisut siulittaasorigallagaat Kim Kielsen, Siumut, Inatsisartut ukiaanerani ataatsimiinnerat marlunngormat ammarneqarneranni assilineqartoq

Naalakkersuisut aningaasanik atuisimanerannik misissuineq unitsinneqarallarpoq Inatsisartunut qinersisoqarnissaanik suaaruteqartoqarnera pissutaalluni, JyllandsPosten allappoq.

Kukkunersiuinermut ataatsimiititaliamit piumasarineqaraluarpoq qulaajarneqarsinnaasut tamarmik qulaajarneqassasut. Naalakkersuisut siulittaasorisimasaat Aleqa Hammondip nunatta karsianit aningaasanik 100.000 koruunit qaangerlugit namminerminut atuisimanera pissutaalluni ataatsimiititaliamit taama piumasaqartoqarpoq.

- Qinersisoqarnissaanik suaaruteqartoqarnera iluatigalugu suliarineqartut tamarmik unitsinneqarput. Ataatsimiititaliani sulinerit unitsinneqarput, pisattatsinnik poortuileruttorpugut angerlarnissatsinnullu piareersarluta, Kukkunersiuinermut Ataatsimiititaliami siulittaasup tullia Anders Olsen Siumut, JyllandsPostenimut oqarpoq.

Inatsisartunut qinersisoqassaaq novembarip 28-ani. Tamanna Naalakkersuisut siulittaasorigallagaata Kim Kielsenip pingasunngormat suaarutigaa.

Suliaq ingerlateqqinneqarnissaa
Inatsisartunut qinersisoqareerpat misissuineq ingerlateqqinneqassanersoq suli ilisimaneqanngilaq.

Siumumit, Atassummit aamma Inuit Ataqatigiinnit piumasarineqarpoq qulaajaaneq naammassineqartariaqartoq.

Misissuineq oktobarip 23-ani naammassineqarsimasussaagaluarpoq.

Politikkikkut aalassassimaartoqarnera pissutaalluni Aleqa Hammond Inatsisartuni Naalakkersuisunilu sulinngiffeqarnisarluni qinnuteqarpoq.

Pingasunngornermili allanik pisoqariasaarpoq. Naalakkersuisut sisamat tunuarlutik nalunaaruteqarput, Atassutip aamma Siumumik Naalakkersuisooqateqarnini unitsippaa.

Aleqa Hammond aamma Siumumit pingasunngornerup ingerlanerani siulittaasutut tunuarpoq. Sivitsunngitsoq Inatsisartunut qinersisoqarnissaa suaarutigineqarpoq.

Powered by Labrador CMS