Modstand
Qinersinissaq qinersisartut piumasaraat
Aleqa Hammondimut Inatsisartunilu amerlanerussuteqaqataanut akerliuneq annertusiartorpoq. Maanna nettimi atsiornernik katersuisoqalerpoq
Tukaqaaq!
Taama naatsigisumik oqaatigineqarsinnaavoq Giiti Tittussen aperigaanni, taannalu Inatsisartunut nutaamik qinersisitseqqulluni skrivunder.net-imi atsiornernik katersuinialerpoq.
Tamanna pivoq qulequtserlugu: Nutaamik qinersinissamik piumasaqaat/Krav om nyt valg.
Taassuma oqaatigaa akunnerup siulliup ingerlanerinnaanni 40-nik atsiortoqarsimasoq, tamannalu takussutissaalluartoq Naalakkersuisut nunamik aqutsinerat qinersisartut naammagileraat.
Aamma atuaruk: Akerliussutsimik takutitsisut qinersinissaq piumasaraat
– Nunatta siuttuata eqqunngitsunik oqaqattaartuarnera naammaleqaaq. Nunarput aquppaa taamatullu pissusilersortariaqarluni. Ajoraluartumik aamma isumaqarpunga qaammatini kingullerni tukattorujussuarmik ingerlatsinermut illua'tungiliuttut ilatsiinnarpallaarsimasut, taamaattumik atsiornernik katersuinialerpunga, Giiti Tittussen oqarpoq.
Atsiornerit janaarip 27-anni tunniunneqassapput, pilersaarutigineqarluni ulloq taanna Naalakkersuisunut akerliussutsimik takutitsisoqassasoq. Giiti Tittussenip oqaatigaa sapaatip akunnerani aggersumi ataatsimiittoqassasoq, tassani aalajangerneqassalluni akerliussutsimik takutitsinissaq sumit qassinullu aallartissanersoq.
– Neriuppugut atsiornerit tamaasa Aleqa Hammondip tigujumaari, januaarip 27-anni katersuukkutta, taanna oqarpoq.
Atsiornernik katersuineq malinnaaffigisinnaavat uani.