Qinersinissamut oqallinnerit pissutigalugit KNR-ip futsal GM-imit aallakaatitsissanngilaq
Tusagassiorfik innuttaasunik kiffartuussisup KNR-ip Ilulissani futsalerluni pissartanngorniunneq weekendimi aallakaatittussaanikuugaluarpaa. Kisianni Inatsisartunut qinersinissamut oqallinnerit pissutigalugit pissartanngorniunnerit aallakaatinneqassanngillat.
KNR-TV-p pissartanngorniunneq aallakaatittussaasimagaluarpaa, kisianni Kim Kielsenip marsip tallimaanni qinersisoqarnissaa nalunaarutigimmagu pilersaarutinik allanngortoqarpoq.
Taamaattumik KNR-ip nunatsinni pissartanngorniunnerit isiginnaarutikkut imaluunniit radiokkut aallakaatinnianngilai, tusagassiorfiup innuttaasunik sullissisup pisortaa, Karl-Hendrik Simonsen Sermitsiaq.AG-mut taama ilisimatitsivoq.
Qineqqusaarneq ukkatarineqartoq
- Pissartanngorniunnerit aallakaatinnissaat qilanaarisimagaluarparput, kisianni qineqqusaartut aamma futsalimi pissartanngorniunnerit ataatsikkut aallakaatinnissaanut sulisugut naammanngillat, Karl-Hendrik Simonsen oqarpoq.
KNR-ip pisut marluk aallakaatitsiffiginissaannut naammattunik atortoqartoq, taanna ilisimatitsivoq, kisianni taakku marluk aallakaatinnissaannut sulisut naammanngillat.
- Ilulissani tv-eqarfik suleqatigalugu immaqa aallakaatitsisinnaasimassagaluarpugut, kisianni matunikuuvoq. Taamaammat futsalimi pissartanngorniunnerit aallakaatinneqarsinnaanngillat. Illuanillu aamma qineqqusaarnerit aallakaatinngiinnarsimagutsigit isornartorsiorneqarsimassagaluarpugut, Karl-Hendrik Simonsen oqarpoq.