Qinersinissamik suaaruteqartoqareersoq: Kielsenip Atassut pakatsissutigaa

Naalakkersuisut siulittaasorigallagaata Kim Kielsenip Inatsisartunut qinersisoqarnissaa suaarutigaa tusagassiortunut katersortitsinermi.

Inatsisartunut qinersisoqassaaq novembarip 28-ani.

Naalakkersuisooqatigisimasatik Atassut Kim Kielsenip pakatsissutigai.

- Atassut allamik isumaqaraluarpoq tamannalu ullaaq allanngortippaa. Naalakkersuisunik qulaajaanissaq tamatta pingaartikkaluarparput, tassanngaanniilu aatsaat kinguneqartitsisoqarsimasinnaagaluarpoq. Naluara partiit allat isertugaqarnersut, Kim Kielsen oqarpoq.

Aleqa nammineerluni tunuartoq
Naalakkersuisut siulittaasorisimasaat Aleqa Hammond nammineq piumassutsiminik tunuartoq Kim Kielsenip oqaatigaa.

Aleqa Hammond Siumumi siulittaasuujunnaartoq pingasunngornermi nalunaarutigineqarpoq. Jørgen Wæver Johansen partiip ataatsimeersuarnissaata tungaanut siulittaasuugallassaaq.

Inatsisartut Allattoqarfiat tusagassiortunik katersuutitsissaaq nalunaaqutaq 21.00.