Qinersinerup inernera ajornartorsiutinik pilersitsisinnaasoq

Venstrep siulittaasua Lars Løkke Rasmussen Danmarkimi naalakkersuisunik amerlanerussuteqartunik pilersitsinissaq pillugu partiinut talerperlernut maannakkorpiaq isumaqatigiinniarpoq. Inissitsiterineq qanorluunniit inerneqaraluarpat Dansk Folkeparti sunniuteqangaatsialissaaq. Pingaartumik Danmarkimi partiiit talerperliit annerpaartaat perngaammik tamakkiisumik alloriarpat ministerinngortitsinissamullu akuersippat.

- Dansk Folkepartip naalakkersuisooqataalersinnaanera Kalaalllit Nunaanni ernummatigineqarpoq, KNR-imi aaqqissuisoq Walter Turnowsky Ritzauimut oqarpoq.

Pingaartumik Siumut, Inuit Ataqatigiit (IA) peqatigalugit Folketingimut ilaasortaatitaqalersoq, Dansk Folkepartimut ilungersunartumik inissisimaffeqarpoq.

- Dansk Folkeparti Namminersorluni Oqartussaanermut atatillugu isorinninnerpaasutut ilisimaneqarpoq, taakkuami partiini kisiartaallutik akerliullutik taasisimapput.

- Tamatuma kinguneranik pingaartumik Siumut aamma DF akunnerminni najummassimanartorujussuarmik isiginnittaaseqarput, Walter Turnowsky oqarpoq.

Taanna oqarpoq, DF-imit oqaatigineqartartut Kalaallit Nunaanni siornatigut kamaammissutigineqartarsimasut:

- Søren Espersenimit Kalaallit Nunaannut tunngasuni oqaaseqartartuusumit oqaatigineqartartut ilassilluarneqanngisaannarput, oqarpoq.

DF-ip naalakkersuisooqataalersinnaaneranik eqqarsaat tunngavigalugu maannakkorpiaq pissangasoqarpoq, taamalu pisoqassagaluarpat tamanna Danmarkip Kalaallit Nunaatalu akornanni pissutsit nillertiallannerannik isumaqarsinnaavoq, Turnowsky nalilliivoq.

Atlantikup avannaanit ilaasortanngortussat isumasiuinerit naapertorlugit qinersineq sioqqulllugu saamerliit talerperliillu naalakkersuisuutitaqalernissaannut aalajangiisuusinnaasutut siulittuutigineqarput.

Ilisimaneqartutulli taama pisoqanngilaq, talerperliit ilaasortaatitanik 90-inik amerlanerussuteqaataasussatut pisariaqartunik pissarsisinnaajumallutik Atlantikup avannaaneersunik pisariaqartitsiunnaarmata.