Qinersinermut ataatsimiitsitaliami ilaasortaq: Unnuaru aatsaat naammassissaagut
Amerlanerpaat qinerisariaqarput. Qinersinermut Kommuneqarfik Sermersuup qinersinermut ataatsimiitsitaliaa pitsorluttut napparsimasullu ornissallugit piareersimavoq
Qinersinerup aqutsisuata Karno Lyngep tallimanngornermi qulingiluanut Nuummi qinersineq ammarmagu politikerit, tusagassiuutit innuttaasullu taasiniat takkussuussimapput. Qinersiviit karsit imaqanngitsut matuneqarput Inatsisartunullu qinersineq 2014 aallartinneqarluni.
Qinersinerit tamarmik pingaaruteqarput, Kommuneqarfiup Sermersuup sulisui pitsorluttunik aallernissaminnik piareersimapput.
- Inuit Katuamukarnissaminnik ajornartorsiutillit Kommuneqarfik Sermersuumut sianerlutik aaqquneqarsinnaapput. Inunnik piareersimatitsivugut qinersiviusumut ingerlatitsisussanik. Aammali allarluinnarmik peqquteqarluni takkussinnaangitsut orninnisaannut piareersimavugut, Martha Abelsen, Kommuneqarfik Sermersuup qinersinermi ataatsimiitsitaliami ilaasortaq taama oqarpoq.
Kisitsineq unnuaru naammassissaaq
Kommuneqarfik Sermersuup qinersinermut ataatsimiitsitaliaa qinersineq tamaat, kisitsinerlu naammassitsiillugu Katuamiissaaq.
- Naatsorsuutigaarput unnuaru marlunut pingasulluunniit missaani naammassissalluta, qinersinermi ataatsimiitsitaliami ilaasortaasoq qinersinermilu kingullermi aamma qinersinermik nakkutilleeqataasoq Ane Egede Mathæussen oqarpoq.
Qinersinermut ataatsimiitsitaliaq immikkut aamma ataatsimiinnissamut piareersimavoq.
- Immikkut ataatsimiinnissatsinnut piareersimavugut, qinersinermut ataatsimiitsitaliami ilaasortaq oqarpoq.
- Imaassinnaavoq taasisinnaatitaanermut apeqqut qaqilerneqartoq. Qaqutigooraluarpoq kisianni ataatsimiitsitaliaq tamakkerluni ataatsimeeriataarsinnaavoq. Ulloq naallugu nakkutilliissaagut, aap qinersineq pissanganaqaaq, Ane Egede Mathæussen oqarpoq.
Kalaallit Nunaanni qinersisinnaatitaasut 40.375-iupput, sumiiffinni 74-iusuniillutik.