kommuninut qinersineq
Qinersinermi taaguunneqarluartoq nuannaaqaaq
Atassutip Inuusuttaani Siulittaasoq, Aqqalu Jerimiassen, Qaasuitsoq Avannarlermi takorloorsinnaanngisaminik inuttut taaguunneqarluarpoq
2014-imi Inatsisartunut qinersisoqarmat Aqqalu Jerimiassen 20-iinnarnik taaguunneqarpoq, ilaasortanngornissamulli amingarujussuarlutik.
Ukiulli pingasut qaangiunneranni allanngortoqarluinnarsimavoq.
Marlunngormat kommuninut qinersinermi Qaasuitsoq Avannarlermi, Aqqalu Jerimiassen, inuttut taaguunneqarnerpaavoq, katillugit 530-nik taaguunneqarsimalluni.
- 100-nik taaguunneqarnissara anguniarsimavara kommunalbestyrelsimut isissutissannik. Taama amerlatigisunik taaguunneqarsimanera uppernaappoq, Aqqalu Jerimiassen nuannaaqaluni Sermitsiaq.AG-mut oqarpoq.
Atuaruk: Politikerit nuannarineqarnerpaat qulit takukkit
Qineqqusaarneq sakkortooq
Atassutip Inuusuttaanit siulittaasuuvoq, Ilulissanilu Atassummiik kisiartaalluni kommunalbestyrelsimut qinigassanngortilluni.
- Qineqqusaarneq sakkortoqaaq, qineqqusaartitsinernimi partiinni kisiartaallunga peqataasarsimangama. Taamaakkaluartoq qineqqusaarnissanut piareersarluartarsimavunga, qinigaanissaralu neriuuteqarfigiuarsimallugu. Kisianni 500-rujut sinnerlugit taaguunneqarnissara ilimagisimanngikkaluarpara. Pisoq upperiuminaappooq, Aqqalu Jerimiassen illarpoq.
Qineqqusaarnerup nalaani Qaasuitsoq Avannarliup qanoq kivinneqarnissaa sammingaatsiarsimallugu oqaatigaa.
- Innuttaasut piumasaat sammilluarsimavara tammannalu piffissamik torrallaaviusimavoq. Isornartorsiuvinermiillu takorluukkama oqariartuutiginissaat pingaartinnerusimavara. Tamanna taaguunneqarluarsimanninnut pissutaasinnavoq, Aqqalu oqarpoq.
Unnuk nuannisaarfik
Marlunngornerulli unnukkua eqqissisimaarfiusimanngilaq.
- Unnuaq festsalimiippugut, tamattalu nuannisaqaagut. Unnuup ingerlanerani parteeqatinnit qummut miloriuttaarneqarpunga, Aqqalu Jerimiassen oqaluttuarpoq.
Ullunin tulliuttuni partiinik isumaqatiginninniarnerit ingerlanneqassasut paasissutissiaraa.
Atuaruk: Qinersisartut politikeri una nuannarilluarpaat