Qinersineq: Lars Løkkep Camp Century pillugu isumasioqatigiinnissaq taamaatippaa

Folketingip Kalaallit Nunaannut ataatsimiititaliaata nunanullu allanut ministeri pingasunngornermi ammasumik isumasioqatigiinnissaraluat danskit naalakkersuisuannit taamaatinneqarpoq.

Ministeriuneq Lars Løkke Rasmussen (V) ataatsimiitaliami siulittaasumut, Aleqa Hammondimut (A), taama nalunaaruteqarpoq. Ministeriuneq naapertorlugu Kalaallit Nunaanni qinersinissamut danskit naalakkersuisuisa akornusersuerusunnginnerinik pissuteqarpoq.

Isumasioqatigiinneq 24. april Inatsisartunut qinersisoqareernerata kingorna pissaaq.

Isumasioqatigiinnermi nunanut allanut minister Anders Samulsen (LA) amerikamiut sermip ataani sakkutooqarfigisimasaanni – Camp Century – saliinissaq pillugu apeqqutinik akissuteqartussaangaluarpoq.

Aalajangiineq naammaginagu Aleqa Hammond, Ritzau-mut oqarpoq.

- Ullaaq ministeriunermit sianerfigineqarpunga. Taassuma oqaluuttuuppaanga, Kalaallit Nunaanni qinersinissaq pissutigalugu danskit naalakkersuisui allatut isummersimasut. Oqaatigaa, qinersinerup nalaani naalagaaffeqatigiinnermut tunngassutilinnik eqqartueqatigiittoqassanngitsoq.

- Sammisat qineqqusaarnermi atorneqarsinnaasut pillugit naalakkersuisutigoortumik imaluunniit atorfilittatigoortumik Kalaallit Nunaannik peqataaffigineqartumik ataatsimiittoqassanngilaq. Tamanna Kalaallit Nunaata Folketingimut ilaasortaatitaannut aamma atuuppoq, Løkke allappoq.

- Tamanna pillugu isumaqatigilluinnarpara. Sammineqartumimi danskit-kalaallillu attaveqatigiinnerinut maaqanngitsoq pineqarpoq, Aleqa Hammond oqarpoq.

1959-1960-llu nillertumik sorsunnerup nalaani Thulemi sakkutooqarfimmiit kangimut 200 kilometerinik isorartutigisumi inissisimasumi USA-p sakkutuuisa Camp Century sermip ataani pilersippaat.

USA-lu danskit kalaallillu inuttaasuinik ilisimatitseqqaarnani sermip ataani atomreaktorimik angallattakkamik misileraammik pilersitsisimalluni.