Video qineqqusaarut takuuk
Qineqqusaartoq atisatoqqanik atortoq: Sulisartutoqqat puigunngilakka
Siumumit qinigassanngortittut arlallit videomik imminut qineqqusaarummik Youtube-mi ilanngussisimapput
– Anaanama atsakkummalu oqaluttuuttarsimavaannga aatata atisanik, maanna atukkattut ittunik, atorluni suliartortarsimasoq, Jens-Erik Kirkegaard, sisamanngorpat Folketingimut qinersinissamut qineqqusaarutitut video-liaminut oqarpoq.
– Siulikka ataqqillugit sulissutiginiarpara piffinni nutaaliaasuni ilaqutariit atugarisaasa pitsanngorsarnissaat.
Siumup qinigassasnngortitaa annoraatoqqamik atorluni marngusamillu nasarsimalluni nerisarfiup nerriviata saniani issiavoq.
Jens-Erik Kirkegaardip taamatut atisalersornermigut ´sulisartut inuussutissarsiornerlu´ sammitinniarpai, isumaqarami qineqqusaarnermi taakkua sammineqanngippallaartut.
S-imeersunit video-t arlallit
Siumup video-liat qineqqusaarutigalugit takussutissiat tupinnaannartut, upernaaq Inuit Ataqatigiit aallartissimasaat, iluaqutiginiarlualersimavai.
Partii nammineq ataatsimut qineqqusaarummik video-liorsimavoq, Aleqa Hammondilu, Pitsi Høeghilu, Erik Jensenilu aamma Martha Abelsen Youtube-mi ullumikkut video-nik nutaarluinnarnik ilisaritinneqarput.
Aleqa Hammondip video-kut qineqqusaarutimini sammivaa naalagaaffeqatigiinnut ilaasortat ataqqeqatigiinnissaat. Aleqa Hammond Nuummi biilerpoq tunuani elektroniskimik nipilersuuserluni.
Pitsi Høeghip videomi qineqqusaarummini anguniarpaa Kalaallit Nunaat naalagaaffeqatigiinnit anissasoq, taarsiullugulu qilersorsimanngitsumik naalagaaffittut suleqatigiinnissamik isumaqatigiissuteqarluni.
Kalaalimernit naalagaaffittullu suleqatigiinneq
Erik Jensenip videomi qineqqusaarummini Pitsi Høeghitulli sammivaa Kalaallit Nunaat naalagaaffik namminersortuussasoq namminerisaminik erfalasunik qilersorsimanngitsumillu naalagaaffittut suleqatilik, taavalu assuaraa neqerpassuarnik Danmarkimit Kalaallit Nunaannut tikisitsisoqartarnera, killormullu kalaaliminernik nassiussinissaq ajornakusoortarluni, ingammik inuinnaalluni namminerlu ingerlatsiviuteqarani.
Martha Abelsen videomi qineqqusaarummini boorluliorpoq, nassuiaatigaluni sorsuutiginiarlugu Kalaallit Nunaanni ilaqutariit inuuniarnermi atugassarisaata Danmarkimi ilaqutariit atugarisaattut qaffasissuseqassasut.