Qimuttut takornarianit annaanneqarsinnaasut
Takornariat qimuttunik nuannarisaqarluartuupput – tamannalu nunatsinni qimussernermik kulturip annaanneqatigissinnaagaa, Sisimiuni Kangerlussuarmilu takornariartitsisartut isumaqarput.
- Qimussimik takornariartitsisarnerup Kalaallit Nunaanni qimussimik kulturi annaassinnaavaa, Hotel Sisimiut pisortaa Visit Greenlandimilu siulittaasup tullia, Anette Grønkjær Lings, isumaqarpoq.
Sermitsiaq allappoq.
Taanna Kalaalllit Nunaanni Islandimi periuseq tunngavigalugu takornariarpassuaqalernissaanik ineriartortitsiniarnermut isorinnittorujussuuvoq, qimussimillu kultureqarneq Kalaallit Nunaanni takornariaqarnerup qanoq ineriartortinneqarsinnaaneranut assersuutissaalluartutut oqaatigalugu, tamatuma peqatigisaanik kalaallit kulturiat qulakkeerneqassammat.
Immikkuullarissuseq
- Nalunngilarput qimusserneq takornarianit nuannarineqartorujussuusoq. Tamanna ilaatigut Norgep avannaani Svalbardimilu misilittakkanit takutinneqarpoq, Kalaallit Nunaannili qimusserneq immikkuullarissuuvoq, kulturitsinnut ilaammat, taamaattumillu takornariat immikkuullarissutsimik tunisarpavut, Kalaallit Nunaannut atatillugu asseqanngilluinnartumik, akunnittarfiutilik, nunap Sisimiut Kangerlussuullu akornanniittup takoriaqarnikkut misigisassarsiortarfittut Kalaallit Nunaanni qitiusutut inissisimalernissaanik annertuumik sulissutiginnittoq, oqarpoq.
Kisianni annertuumik unammilligassaqarpoq. Tassami Kalaallit Nunaanni qimussimik kulturi kinguariartorpoq. Tamanna Qeqqata Kommunianit aamma Avannaata Kommunianit kisitsisinit takutinneqarpoq.
Ukiut ikitsut iluini 1700-it 1000-nut
- Ilulissani qimuttut ukioq kingulleq 2.000-it missaannik amerlassuseqarput. Kisitsisinik eqqoqqissaartunik siusinnerusumeersunik peqanngilagut, kisianni ukiunik 25-iinnarnik kingumut qiviarutta, taamani qimuttut 15.000-it aamma 20.000-it akornanni amerlassuseqarunarput, Avannaata Kommunianeersoq, Ilannguaq Hansen, oqarpoq, nassuiaallunilu, qimuttut ikiliartornerannut ilaatigut silap pissusaata allanngoriartornera pissutigalugu sikuunikinnerusalersimanera pissutaasoq, kisiannili aamma piniartut qimussinut taarsiullugu qamuteralannik atuisalersimanerat pissutaasoq.
Taamatorluinnaq pisoqaleriartuaarnera Sisimiuni aamma takuneqarsinnaavoq, qimuttut 2003-mi 1700-nit ullumikkut 1.000-it missaannik amerlassuseqalerlutik ikileriarsimammata, Qeqqata Kommunianeersoq, Lone Kristensen, paasissutissiivoq.
Allaaserineqartoq aviisimi Sermitsiami tamakkiisumik atuarneqarsinnaavoq. Aviisi uani pisiariuk: