Ilulissat
Qimussillammak misilittakkaminik ingerlatitseqqissaaq
Avannaata Qimussersuani tallimariarluni ajugaanikoq Jørgen Kristensen qimussimik unammisartutut inuunerminik oqaluttuarpoq
Qamutit atortullu allat Ilulissani kulturip illorsuani Sermermiuni scenemi takussaajumaarput tallimanngornermi unnukkut Avannaata Qimussersuani ajugaasareersoq Jørgen Kristensen misilittakkaminik oqaluttualerpat. Taanna Nunatsinni kisiartaalluni Avannaata Qimussersuani tallimariarluni ajugaanikuuvoq.
Atuaruk: Namminersorlutik oqartussat kulturikkut nersornaasiuttagaat 2013 tunniunneqarpoq
Kulturip illorsua Sermermiut Jørgen Kristensenip saqqummiussinissaanut aaqqissuisuuvoq taannalu unnugu tallimanngornermi nalunaaqutaq 19.30 pissaaq.
Pisorpasuit
- Atortut assigiinngitsut nassarniarpakka Avannaata Qimussersuani atortarsimasakka. Aamma assit videollu ukiut ingerlaneranni katersorsimasakka takutikkumaarpakka, Jørgen Kristensen Sermitsiaq.AG-mut oqaluttuarpoq.
Atuaruk: Avannaata Qimussersuata kunngia
Jørgen Kristensen qimussimik sukkaniunnermi unammisartutut ukiormanna naggataarpoq. Taanna 1993-miit sukkaniuttartuni Nunatsinni pikkorinnerit akornanniittuarsimavoq. Ukiut sisamat kingulliit tulleriisillugit Avannaata Qimussersuani ajugaasarpoq katillugillu tallimariarluni ajugaasimalluni. Taamaammat tulluartutut isigineqarpoq namminersorlutik oqartussat kulturikkut nersornaataannik inuiattut ullorsiornitsinni tunineqarmat.
Ilulissani sukkaniuttarnerpassuit saniatigut illoqarfinni allani aamma sukkaniuteqataasarsimavoq.
- Saqqummiinissannut immaqa piareersarnerusimasariaqaraluarpunga. Tassami sukkaniuttartuunermi atortut misiligarneqartarput ikinngutigiinnerpassuillu ukiut ingerlaneranni pilersarlutik, Jørgen Kristensen oqarpoq.
Jørgen Kristensenip saqqummiussinissaanut nalunaaquttap akunneri marluk immikkoortinneqarsimapput naggasiullugulu najuuttut apeqquteqarsinnaassallutik.