qimmit nappaataat
Qimmiutillit uumasut nakorsaat naammaginagu isornartorsiorpaat
Qimmit nappaataannut akiuussutissamik kapuuineq allanngortinneqarsimavoq, tamanna paasissutissiissutiginagu, qimmiutilik oqarpoq
Nunatsinni illoqarfiit annersaasa pingajuanni, Ilulissani, qimmit nappaataat annertuumik ajornartorsiutaalersimavoq.
Qimmit illoqarfimmi angalaaginnartut aallaaneqartarsimapput, illoqarfimmilu qimmit nappaataata atugaanera pissutigalugu qimussinik sukkaniunnissarsuarmi ´Avannaata Qimussersua´-ni Ilulissanit peqataasussat mattunneqarsimapput.
Sukkaniunnissarsuaq apriilip aallartinnerani Uummannami ingerlanneqassaaq.
Qimmiutillit ernumasut
Maanna Ilulissani qimmiutilik Hansigdne Paarma Berthelsen nalunaarpoq qimuttut parvo-virus-imut qimmillu nappaataannut akiuussutissamik kapineqartarunnaarsimasut.
– Taamaallaat perlerornermut kapisisoqartalerpoq. Tamanna pillugu kommunimit paasissutissinneqarsimanngilagut. Tamanna pissutaavoq Ilulissani qimmit ilaasa napparsimalersimanerannut. Isumaqarsimagaluarpugummi kapuut immikkoortunik pingasunik taakkuninnga imaqartoq, taanna Ilulissani qimmiutillit sinnerlugit tusagassiorfinnut nalunaarummi allappoq.
Uumasut nakorsaat isornartorsiorpaat
Tamanna peqatigaulgu erseqqissarpaa uumasut nakorsaata uumasunut nakorsiartarfia tamatigut matoqqasartoq.
– Ukioq kaajallallugu taamaassimavoq. Qimmiutivut ernumagaavut, toqunneqarnissaallu utaqqiinnarusunngilarput, Hansigne Paarma Berthelsen oqarpoq.
Taassuma Ilulissani uumasut nakorsaat Sanne Eline Wenneberg naammaginngilaa, pingasunngormat kingullermik Qanoruumut oqarmat tupigusuutigalugu qimmiutillit sooq qimmiutitik ernumaginerunnginneraat.
– Qimmiutillit kisiisa pisuutinniarneqarsinnaanngillat, Hansigne Paarma Berthelsen oqarpoq.