Qimmiutillit naalliutsitsisimasutut akiliisitaapput

Ilulissani qimmiutillit marluk uumasunik illersuineq pillugu inatsimmik unioqqutitsisimanertik nassuerutigaat. Uumasunik naalliutsitsisimasutut, pinerluttulerinermi inatsimmik unioqqutitsisimasutut, akiliisussanngortitaanertik aamma akueraat.

- Iluarinanngilluinnarpoq qimmeqartoqarmat qimmiminnik nakkutiginninngilluinnartunik kaatitsisartunillu, Ilulissani uumasut nakorsaat Sanne Eline Wennerberg oqarpoq.

Qimmiutillit marluk qimmiminnik paarsinerlussimanertik pillugu akiliisussanngortitaapput. Inuit pineqartut akiliisussanngortinneqarput aatsaat taamaaliormata.

Uumasut nakorsaata qimmiutillit marluk Ilulissani politiinut ukioq manna aallartissimalersoq nalunaarutigai. Uumasut nakorsaata qimmiutillip aappaa pillugu nalunaarutigigamiuk ilaatigut ima allappoq:

- Qimmii takuneqarsinnaapput sivisuumik nerisinneqarsimanngitsut. Qimmeq qimmeqarfimmi toqunneqartoq sivisuumik nerisinneqarsimanngimmat saluttuararsuuvoq. Perlilingaarami aaqqat sullisigineqartartoq plastikkeq neriniarsimavaa, Sanne Wennerberg nalunaarummini allappoq, oqarporlu qimmiutillip qimmini kaatsittaqalugit paarinerlussimaqigai.

- Qimmiutillip qimmini taama pisussaanngilai, tamannalu ajorluinnarpoq, uumasut nakorsaat erseqqissaavoq.

Qimmiutillip aappaata qimmini paarinerlussimavai kaatsittarlugillu – qimmit marluk tamanna toqqutigisimallugu.

- Qimmit pisariaqanngitsumik sivisuumik naalliutsinneqarlutillu isumagineqarsimanngillat. Takuneqarsinnaavoq qimmiutillip qimmini ullut tamaasa nakkutigisarsimanngikkai, Sanne Eline Wennerberg allappoq.

Uumasut nakorsaata nuannaarutigaa politiit suliassaq sukkasuumik suliarisimammassuk.

- Neriuutigaara qimmiutillit paasissagaat qimmiminnut taama iliuuseqarsimanertik inuiaqatigiinnit akuerineqanngimmat. Kinaluunniit qimmilik qimmini ullut tamaasa akisussaaffigisussaavai, Sanne Eline Wennerberg oqarpoq.

Qimmiutillit inatsimmik unioqqutitseqqippata eqqartuussivikkut suliassanngortinneqarsinnaapput, qimmiinik arsaarneqarsinnaanngorlutik.