Kapitinneq
Qimmiutilippassuit qimmitik kapitittariaqanngilaat
Qimmiutillit januaarip aallaqqaataanit inatsit naapertorlugu pinngitsooratik qimmitik qimmit nappaataannut parvovirusimullu akiuussutissamik kapitittussaavaat.
Tamanna qaasuitsup kujammut killeqarfiani qimmiutilinnut qitsuutilinnillu – Tunumi qimmeqarfiusut pinnagit atuuppoq.
Atuaruk: Qimmit tamarmik akiuussutissamik kapineqassapput
Immikkut akuersissut taamaallaat 2017-imut atuuttoq, Kalaallit Nunaanni Uumasunut Nakorsaqarfik Inuussutissalerinermullu Oqartussaaffik (UNIO), tusagassiuutinut paasissutissiivoq.
Aarlerinartumiinngitsut
Qimmit qitsuillu qimusseqarfiunngitsumiittut nappaatinik tunillatsinnissaminnut aarlerinartumiinngitsutut nalilerneqarput.
Ukiup nikinnerani qimmit 18.000-it qitsuillu tamarmik kapitissasut Naalakkersuisut inatsisilioraluarput. Inatsisiliorneq pivoq 2016-mi qimmit 400-nik amerlanerit toqunerisa kingunerisaanik oqartussanillu aalajangerneqarluni kapitittoqartalernissaa piumasaqaataalissasoq.
Maleruaqqusat eqqortut
UNIO tusagassiuutinut nalunaarusiamini ima paasissutissiivoq:
– Qimmiutillit Naalakkersuisunut uppernarsassavaat qimmiutitik inatsisip atuutilinnginnerani aalajangersimasumik qimmit nappaataannut parvovirusimullu akiuussutissamik kapitittarsimallugit.
Uppernarsaatit
Uppernarsaat atuuttoq tassaasinnaavoq:
Uumasup peqqissusianut nalunaarsuiffimmi imaluunniit EU passimi akiuussutissamik kapititsisimanermut nalunaarsuinerit
Uumasup nakorsaata namminersortup qimmeq pillugu nalunaarsuiffia
Uumasup nakorsaata imaluunniit qimminik nakkutilliisup ataasiarluni akiuussutissamik kapisisimanerata uppernarsaataa
Atuaruk: Qimmit nappaalanerannut akiligasseerujussuartoqarsinnaasoq
Kalaallit Nunaanni Uumasunut Nakorsaqarfik Inuussutissalerinermullu Oqartussaaffik (UNIO) kisimi uppernarsaatinik atuuttulersitsisinnaavoq aamma piumasaqaatit pillugit nalilersuisinnaatitaalluni.
Immikkut ittumik Kalaallit Nunaanni Uumasunut Nakorsaqarfik Inuussutissalerinermullu Oqartussaaffimmit piumasaqaatit akuerineqarpata, qimmeq ukiut pingasut aatsaat qaangiuppata akiuussutissamik kapitinneqassaaq, kingullermik kapitinneqarata ullua naapertorlugu.
Immikkut akuersissut taamaallaat 2017-imut atuuppoq.
Inatsisit malillugit perlerornermut akiuussutissamik kapitinneqartussaanera suli atuuppoq.
UNIO-p erseqqissaassutigissavaa suli inatsisit malillugit qimmit aamma qitsuit perlerornermut akiuussutissamik kapitinneqartussaammata.
Uumasuutillip nammineerluni akisussaaffigivaa uppernarsassallugu uumasuutimi piumasaqaatigineqartut naapertorlugit akiuussutissamik kapitissimanera.